FEAU O LE ASO!
(Message of the day)
Matua: Mataio 18:15-17, 21-22
Manatu autu: Tutumau i le alofa faa-le-Atua.
O Salefo’i ma Salefiu, o nisi ia suafa ma faalupega na fanau ma tupu mai Malua, e faasino i le tutumau, finafinau pea, o le ola tauivi ma le soifua a’otauina. O faitauga o lenei aso o loo a’oa’o mai ai e Iesu le ola tutumau i le alofa faaleAtua, le alofa mutimutivale o le Atua e faatino i le ‘aua le fiu, ‘aua le foi, ‘aua le faapea mai e leai. O le a’oa’oga muamua, pe afai e agaleaga mai se tasi o ou uso i totonu o le Ekalesia. Ia oulua muamua fesaga’i muamua na o oulua e soalaupule. Afai e le mafai, ona oulua o lea ma se isi uso e fai ma molimau, ma fesoasoani ina ia gaua’i mai le uso agaleaga. Pe afai lava e leai, ia ‘aua le fiu, a ia ave i totonu o le Ekalesia, le Aulotu. E faasolo atu ai i le Pulega, le Matagaluega, e oo ai i le Komiti Au Toeaina seia oo i le Fono Tele. O le tele o nei mau auala, e faailoa ai lou ‘aua le fiu ‘aua le foi, a ia saili pea lava pea le auala e fai ai leleiga, i le alofa faaleAtua.
O le isi mataupu, o le fesili pe faafia ona agaleaga mai se tagata ma faamagalo atu i ai? O le tali foi, ia ‘aua le fiu e faamagalo, ‘aua le foi e faamagalo. A ia tutumau pea lava pea i le alofa faaleAtua, e faamagalo faifaipea, e fai ma masani ma amio ma olaga le faamagalo. Ia fai ma au mea taumafa, e le gata i le inu i ai i mea leaga e fai mai, ae toe inu foi le faamagalo atu.
Ua tatou molimau i nei aso i luga o fesootaiga faatekonolosi ma aga fesootai, i fetauaiga ma fetuiaiga ona o polokiki ma faigamalo, o tautuuaiga ma taufaaleaga, faasolo atu i taui ma sui e ala i faamasinoga ma isi foi faaleaga. Ua mativa le ola faamagalo, leai se alofa faaleAtua, na o le ita faatiapolo, taui ma sui faasatani. O i tatou o soo o Iesu, ia tatou faia se faataitaiga lelei, e tausolomua le faamagalo ma taui atu i le lelei, ma ia tutumau ai tusa pe fai pea ma fai soo, a ia salefoi, salefiu i le faia o le alofa ma le agalelei pei ona faia e Iesu. Amene.
Faitoaga Tolua (FS)
………………………………………
