FEAU O LE ASO!
(Message of the day)
Tusi Faitau: Ioane 15: 1 - 7
Manatu Autu: O a’u nei o le vine moni (I am the true vine)
O le Salamo 80:8-10 ma le Hosea 10:1, o nisi ia o mau o le Feagaiga Tuai, e faasino i le vine a le Atua, le vine na aumai mai Aikupito ma totō i Palesitina; ma o le taofiga maumaututū o Isaraelu, o i latou o le vine lea a le Atua. E sa’o a e le ‘a’o, pe a fua i lo latou lē faamaoni i lo latou valaauina. Peita’i ua fetalai manino Iesu, o Ia o le vine moni a le Atua; le vine moni e tupuga tonu mai le Atua, o le puna o le ola i le tino, le ola faaleagaga ma le ola faavavau.
O le uiga loloto o lenei faatusa/faataoto i le vine ma ona la, e faatatau i le fesootaiga vavalalata a Iesu le puna o le ola, ma le tagata faatuatua e pipi’i atu ia te Ia, na te maua ai le ola maloloina i la le tino aemaise i le ola faaleagaga ma le ola faavavau. E faasino foi i le puna o le malosi, o le puna o le manuia, o le puna o le amio faapaiaina, o le puna o le alofa, le amiotonu ma uiga faaleAtua uma. O le tagata e mautu lona fesootaiga vavalalata ma Iesu, e fua lelei faaleagaga, e faapea foi ona teuteu atili ma saga fa’aaoga atili e Iesu mo ana feau. A o le la la poo le tagata e le fua mai e tusa ma le finagalo o le Vine, e salaeseina – e lē o se faasalaga, a o le faamasinoga amiotonu a le Atua, o se avanoa o lona alofa mutimutivale, e toe fuata’iina ai, e ala i le salamō ma toe faapipii i le pogai e manuia ai.
O se faatusa foi e faamalosi’au i le au faatuatua e pipii ma faalagolago, tapua’i ma tautua faamaoni, e osi taulaga ma auauna lē faalogologo tiga. Ina ia olioli ma fiafia, auā o le tele o le ola e ave mo Keriso, o le saga faateleina foi lea o le ola e tului ma toe faatutumu mai e Ia. O lena ua mae’a faiga taulaga o lenei tausaga, ua faamalo faafetai i taulaga ua mafai ona faia, ia mu ma manogi mo le viiga o le Atua. Faatali laia mo le toe tului, ma le toe faatutumuina mai e le Atua o lou ma’au ua ofo atu mo Ia. A o tatou vaavaai atu i le Kerisimasi faamanatu le fanau mai o le Mesia, o le Vine moni lava lea na tupu a’e e aumai le ola, ma le ola faavavau, e ala i lona maliu ma lona toetu manumalo. Ia ia te Ia le viiga. Amene.
Faitoaga Tolua (FS)
………………………………………
