CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau:     1 Peteru 5: 1 – 6

Manatu Autu:  Ua faaeaina le loto maulalo  (Humility Exalted)

E i ai le fesootaiga vavalalata o le Loto Maulalo ma le Faaeaina; o auala ia a le Atua, ma lana amiotonu, e faaeaina ai i le manumalo le tagata e faamaulalo, a e faamasiasi i le toilalo popo le tagata faamaualuga. E le’i sesē lava lenei auala talu le amataga mai o le lalolagi, e oo mai nei lava; ua fia ni faata’ita’iga o ta’ita’i ma tagata lautele, e faamaonia ai lenei mau? A o lenei lava e fai pea e nisi o i tatou (aemaise i faigamalo) le faamaualuga? O lona uiga o i latou nei e lē talitonu i le Atua, o loo manana’o e lu’i lenei auala faaleAtua, e tofotofo e faasesē le Atua, ma faailoa mai e faaeaina foi le loto faamaualuga! Talofa e, i lo latou valea ma lo latou faalumaina.

O le Tusi Faitau (1 Peteru 5:1 – 6), ua tatou faitau ai i le loto maulalo ma le agamalu o le Atua e lotolotoi ia te i tatou, ma le loto maulalo e manaomia e fafaga ai isi tagata, e siitia ai le tulaga o nisi, ma auauna atu mo nisi, e faavae i le iloa lelei o le alofa tunoa o le Atua. O le loto maulalo, e faasino tonu i la tatou tali atu i le alofa tunoa o le Atua, e ala i lo tatou va fealoa’i, ma le va fesootai lelei ma isi tagata, ina ua lagona le valaau e fai so tatou sao i suiga lelei ua manaomia e o tatou tuaoi, ma le lalolagi atoa i aso nei. E faasino i le avea o i tatou ma aao, o vae ma lima o le Atua i le lalolagi i o tatou auga tupulaga.

 O loo i ai se feau faapitoa mai le Tusi a Peteru, faasino i le eseesega, po o le fefiloi ma felanua’i o ituaiga tapuaiga ma lotu i totonu o le faa Kerisiano. E lē o faapito mo se ituaiga le feau, a e mo soo se tagata ua mulimuli ia Iesu, ua faatuatua ia te Iesu, ua talia o Ia le Keriso, le Mesia Valoia, o le Atua lava Ia ua faamaulalo e ala i lona liutino tagata, ma ua afio mai i le lalolagi. E leai ni faiga pulega, ni faiga ta’ita’i, ae tutusa tagata uma i le valaau ina ia ola loto maulalo. O pule uma e i lalo o le pule silisili a le Atua. E tusa ma le faatusa o Keriso i lenei vaiaso, o le malamalama, o le faitotoa, o le vine ma ona la, ua valaauina ai i tatou uma o e faatuatua ia te Ia, ina ia fai ma ona la e susulu atu le malamalama o lona soifua, lona alofa, lona loto maulalo, e faaeaina ai i tatou foi, e pei ona faaeaina ai o Ia, ma foaiina atu ia te Ia le suafa e silisili i suafa uma lava, ma tootuli tulivae uma o le lalolagi ia te Ia, ma faateleina ai le viiga o le Atua le Tala.

 A o faai’u le vaiaso o le Atua ua Afio Mai, ma le toe Feau o le Aso o lenei tausaga, o se meaalofa sili foi lea mo lenei Kerisimasi, ina ia tatou maua le loto maulalo, e faamagalo atu ai i isi, e toe faalelei ai ma isi, ma ia salamō faamaoni ai, ma faatuatua ia Iesu. Ma ua momoli atu ai nei faamanuiaga mai le Ofisa Tutotonu o le Ekalesia, i le paia maualuga o le EFKS i ona tulaga faalupea. Ia tatou tau mai maua se Kerisimasi Fiafia, ma se Tausaga Fou Manuia. Amene.

                                                                                                                 Faitoaga Tolua (FS)  

                                                                                                                                                                  ………………………………………