CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi/ Faitau – Kenese 32:9-21

 Manatu Autu – … manumaloina o se uso

                             …winning a brother

Faaaogaina le fuaiupu e 11, e maua ai ni mafaufuga faaleagaga mo lenei aso.

“Ou te aioi atu, ia e laveai mai ia te au ai le lima o lo’u uso, o le lima lava o Esau; aua ou te fefe ia te ia, ina ne’i sau ia ma fasi a’u, ma tina atoa ma fanau.”

O le upu manumalo, e masani ona faalogoina, pe a, a’e ma le manuia se faiva, e ma si’i ae tapuaia. E le gata i faagatama i le tai, ae faapea foi taaloga masani i nuu ma le atunuu. I lona faaaogaina lautele, i totonu o le Tusi Paia o le upu manumalo, e maua ina ua manuia se taua, po se faamoemoe sa alo i ai.

O lagona o le fiafia ma le faageetia e tutupu ae, i taimi e oo mai ai le manumalo.

“…manumaloina o se uso” O le tala masani, e le fou i le faitau ma le faafofoga.

O le toe foi o Iakopo i ona lau  fanua ma lona faasinomaga, ina ua faatamaoaiga e le Atua ona lima, e ala i lafu manu, ma ona tagata ua faatoateleina.

O le uso sa valavala, ona o le feeseeseaiga i le faamanuia tuugutu a matua. E ala tautua o aso uma.

Lea la ua togo malama, ma ua tonu ai i le manatu o Iakopo, sei toe foi e lalaga sootaga faa le uso. Ae paga lea. O lo o i ai le ao tele o lo o faamalumalu mai, ua fai ma ala faigata o le toe foi atu.

A lea e manino i le fuaiupu ua fai ma matua, le augani ma le aioi a Iakopo i le Atua, sei alofa ma laveai mai ia te ia, ai lima o lona uso o Esau.

Atonu na lagona e Iakopo, i sona manatu faa le tagata, e le faigofie lona toe foi atu. Ae faafetai i le tofa saili ma le utaga poto, ua saili ai i le Atua le manumalo.

“Ou te aioi atu, ia e laveai mai ia te au ai lima o lo’u uso, o le lima lava o Esau; aua ou te fefe ia te ia,  ne’i  sau ia ma fasi a’u ma tina atoa ma fanau.”

E le gata o le leleiga sa saili i le Atua, ae sa fuafuaina lelei lona polokalameina, fai mai Iakopo i ana auauna.

O mai ina muamua, a outou fetaiai ma Esau, ae fesili mai po o ai e ana mea ia faailoa iai, o mea a la’u auauna o Iakopo, o mealofa ma lo’u alii Esau.

E le gata i e na muamua, ae o e na lona lua ma lona tolu. Ua faapea atu, o loo mulimuli mai lau auauna o Iakopo, ma lona manatu maua luga ua faalauleleia le lua va i ana mealofa.

Ioe le sailiga o le nofo lelei ma le uso, e le manumanu ai i le tamaoaiga, ae naunau ia nofo fealofani.

A faaauau pea le tala, faimai na toe feiloai fiafia Iakopo ma Esau.

O le ata o le manuamaloina o le uso.

O le feau faamantu foi lea mo i tatou i le nei aso, o le leleiga ma le uso, e manumaloina ina ua saili i le Atua, le tofa ma le moe. E le manumanu, i le tamaoaiga ae naunau i sootaga mafana.Ae o fuafuaga ma lavasiga ua faataunuuina ona o le alofa tausi mai o le Atua.

Manatu foi e le toe po malae, i le pale feagai o lana ekalesia ma le fono usu, ae o lea ua faamanatu mai le feau o le talalelei, manumaloina se uso..

Manumalo e ala i le saili atu i le Atua, ma le loto maua lalo.

Se uso o fia maua se fesoasoani.

Ia manuia le feagai ai o lana ekalesia ma lona fonotele o lenei tausaga.

Maotua Upulasi (AM) 

.………………………………………