GALUEGA O LE IUPELI

Setema 2016

 

E ofo alofa atu i le paia o le Ekalesia i soo se itu o le lalolagi o maua mai ai lenei upega tafailagi.  E talitonu o loo maualuga pea le aoina o le masina i nofo a faafeagaiga aemaise o le paia lasilasi o le Ekalesia i ona Matagaluega uma.  Ae o se repoti lata mai lea o le tulaga ua i ai le malumalu o le Iupeli e pei ona fitaituga i ai le Ekalesia. 

  • Aso 12 Setema 2016

O loo faaauaua pea galuega o le tatou Fale Iupeli. Toeitiiti ona mae’a lea o le fausia o fata paipa (scaffolds) aua le aveina a’e o le falealuga ma isi galuega uma o loo totoe o totonu.

  • Aso 16 Setema 2016

O le aso 15 Setema 2016, na amata aveina a'e ai iviivi mo le taualuga ua leva aso o faatali i ai le Ekalesia. Ua faagaoioi foi isi tulaga uma o le fale. 

        

 

O ata o le tulaga ua i ai nei le taualuga o le fale

E lua ofo ua faatau mai I le komiti o Feau Eseese mo le tatou galuega

  • O le ofo muamua o le susuga I le Toeaina o Simeona Taefu FT ma lana aulotu.  Ua finagalo le Toeaina e lafo atu ata ma tau o le Pulelaa ma le La’o’ai Faamanatuga se’i fai i ai se latou filifiliga po le fea o mea ia e lua latou te totogiina
  • O le ofo a le susuga I le Toeaina o Tunumoso S Iosia, o le Sui Taitaifono foi lea o le Ekalesia.  Ua finagalo le Toeaina e fai e lana Pulega a Falealili, le vaega o le a le filifiliina e le aulotu a Simeona Taefu FT.  O lona uiga a filifili e le aulotu a Simeona Taefu le pulela’a, e fai e le pulega a Falealili le Laoai Faamanatuga.  Ae a fai e le aulotu a Simeona Taefu FT le La’oai Faamanatuga, ona fai lea e le Pulega a Falealili le Pulela’a.

 Talosia le alofa o le Atua ia faamalumalu pea i le galuega a lana Ekalesia.  Afai e finagalo se tasi, se aulotu, se pulega po o se matagaluega e fai mai sana ofo, faafesootai mai le Failautusi Aoao o le Ekalesia.  Faafetai galulue, Faafetai le alolofa i le Atua ma lana Talalelei.

 

Vavatau Taufao FS

Failautusi Aoao EFKS

                                                                         GALUEGA O LE IUPELI

                                                                             03 o Fepuari 2017 

                                     "E le o le fitafita, e le o le malosi, a'o lo'u Agaga, ua fetalai mai ai le Ali'i o au (Sakaria 4 : 6)" 

Tatou vi'ia faatasi le alofa tunoa o le Atua ina ua aulia e lana Ekalesia lenei Tausaga Fou 2017. La ta faiga malaga o le 2016 na lutia i puava peitai o aao alofa fa'atama o le Ao o le Ekalesia sa tauave apoapoina lo outou soifua ma lo'u nei ola, lea ua mapu ai i Fagalele la ta folauga.

Ou te fa'apoipoi la'au tuvanu ma ou fa'atulou! Fa'atulou i Tamā o le Ekalesia. Tulou le aufaigaluega i susuga i faafeagaiga ma faletua. Tulou pa’ia sautuafafafa ma mamalu sautualagi o le Ekalesia mai tupu se ia o’o i pepe meamea. Faatalofa atu ma le faaaloalo – Talofa! Talofa lava.

E talitonu le taofi o se tiute tatau mo le Ofisa, ona taulogologo i tulaga o le galuega o feagai ma le ta Ekalesia aua le silafia o so’o se tagata lotu o le EFKS. Le ala lea ua manatu ai e saunia se ripoti mo le silafia e faigatā lau tapuaiga tatalo ma lau tu’i o le mulipapaga.

 

  1. Tulaga ua iai nei le galuega

       

  

  • Ua na’o ni nai galuega laiti o totoe ona ma’ea lea o galuega a le Kamupani a le Diamond Head Design and Build Construction i le faamaluina o le tatou fale.
  • O le fa’alo ua ma’ea faapipi’i e le FPA Construction a’o lo’o fa’ama’ea le valiina faatasi ma laupapa ifilele o lo’o mamanu e le A’oga Tusiata. Faamoemoe e ma’ea lenei galuega i le vaiaso nei.

Ae fia faaleoina se faafetai i le susuga i le faafeagaiga ia Namaia Tuiletufuga Kofe ma le faletua ia Pelemoni Kofe, faapea tupu, tamali’i ma faleupolu ma le aulotu i Vaotupua i Falealupo – O ifilele ua ta’ua, o le latou meaalofa mo le galuega.

 

  • O le galuega o le teuina o sima (plaster & water proofing) ua tele ina ma’ea totonu ae o lo’o faaauau pea i fafo. Pe a ma le 80% o lea galuega ua ma’ea e pei ona galulue ai le VW Contruction.
  • Na feiloai mai le susuga a Francis Caffarrelli, le pule o le Aluminum Design Ltd o loo galulue i faitotoa ma fa'amalama, ma o loo solosolo lelei ana galuega. E faatali le faapipi’iina o vaega nei se’i ma’ea le tele o galuega o loo faia i totonu.
  • Ua fa’aauau pea galuega tau eletise ua tuuina atu i le Kamupani o le Telecomp Tronics Ltd. Atonu e maua atu i se tasi ripoti i le lumanai le tulaga o le galuega lea.
  • I luga a’e o faitotoa ma fa'amalama o lo’o taoto ai le vaega e faia i tioata lanu teuteu (arches). Ua gasolo lelei le fausia o faavaa uamea (frames) mai le Kamupani Va’a (Shipping) a’o lo’o galulue pea le susuga i le ali’i pule ma le Aoga Tusiata mo le fausia o tioata.
  • Ua gasolo lelei foi le fauina o nofoa mo le malumalu e le Kamupani a Lesa Keil i Vaitele.
  • Ua amata foi le teuina o autafa o le falesa e le Kamupani o le OTT Construction.

  

  

  1. Isi vaega o le galuega - e lē mafai ona gaioiina seiloga e ave'ese uma fata paipa (scaffolds) o loo i totonu o le fale.
  • Potu (Vestry) e teu ai tusi tapuai ma isi totoga masani mo le tapuaiga ua ma’ea tapena.
  • Pulela’a – Ua ofo mai le susuga i le toeaina ia Simeona Taefu ma le aulotu Mount Druitt latou te faatupeina.
  • Laulau Faamanatuga (La'o'ai) – Ua ofo mai le susuga i le Toeaina ia Tunumoso S. Iosia ma le pulega i Falealili latou te faatupeina.   
  • O le ma'a fola fale (tiles) e faapipi’i e Fepulea'i Flooring Company.
  1. Moli Teuteu o lo’o tau saili – Chandeliers
  • E tasi (1) se moli telē mo luga a’e o le Laoai – manaia pe a 1.5 mita faatafafa pe 2 mita kolosi lapotopoto (diameter = 2 metres).
  • E iva (9) isi moli feololo ifo le laiti -  manaia pe a 1 mita faatafafa pe 1 mita kolosi lapotopoto (diameter = 2 metres) – mo le isi vaega o le faalo.

O lo’o tausaili mai nei ni moli i luga o le upega tafa’ilagi (internet) i Ausetalia po’o Niu Sila fo’i. E tatalo atu ma le faamaualalo afai e tau ane ai se isi o le tatou Ekalesia o alala i Niusila po’o Ausetalia i ni moli mananaia (beautiful and unique) faamolemole faafesootai mai le Faulautusi i le imeli This email address is being protected from spambots. You need JavaScript enabled to view it..

 

Ae le gata i lena, o lo’o avanoa fo’i ni ofo alofa mo le tatou galuega pe a tusa ai ma finagalo. Afai e fia ofo mai e fai sau moli ona fesootai mai lea i le imeli ua ta’ua. “A ou te le fia faia se mea e tasi pe a le to mai sau pule, ina ne’i pe’i o se mea ua faatauanauina lou agalelei mai, a ia faia ma le loto” Filemoni 14.

   

E tele nisi mea o le tatou galuega ua leo ta’ua. Ae o le a taumafai lava e fofola atu i se tulaga fai fai pea se ia o’o ina ma’ea. Ae le ititi se faafetai a le auauna i lau tatalo. Se vaivai ma se faatauvaa, ae ua maua pea le malosi i le mana o le tapua’iga tatalo a le Ekalesia. Faafetai! Faafetai! Faafetai tele lava.

 

Ia faamanuia tele atu le Atua i le Pa’ia o lana Ekalesia.

 

Soifua, O la outou auauna ia Keriso

 

Vavatau Taufao FS