CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Eperu 8:1-9:10

Matua: Eperu 8:11

“Latou te le a’oa’o atu foi taitasi i le la te tuaoi, ma taitasi i lona uso, e faapea atu, ia e iloa le Alii; auā e iloa a’u e tagata uma lava, o tagata nuu atoa ma alii.”

Manatu Autu: Ositaulaga Sili o se feagaiga fou (High Priest of a new covenant)

O le tasi tofiga a le matou Pulega sa falē ai le mataupu i nofoaga o aulotu i le fale o le pulega i le fonotele i Malua; ma o le tasi nuu itiiti lava o le matou pulega o le nofoaga lava o le latou faifeau o le pito i tua, ona a faatulaga i le aganuu, ma va nonofo ai o nuu o le Pulega e fetaui lelei le nofoaga o le faifeau o le nuu itiiti lea, peitai ina ua fai le latou faifeau ma teutupe o le Pulega – ona a’e lea o se manatu i le aulotu lea pe le suia i luma le nofoaga o le latou faifeau – ia see atu i le pito i luma le nofoaga o le latou faifeau  auā e pei e ala ona pito i tua le latou faifeau ona o loo faatulaga lava i tulaga ma nofoaga fale-aganuu o le itumalo. Ma sa faafaigata le mataupu ona o tulaga faaleaganuu ma le va nonofo ai o nuu lea lava ua oo mai i le lotu o fai ai lava.

O i na saunoa ai le tasi faifeau matua o le Pulega, “Malilie ia poo fea lava e te nofo mai ai pe ete nofo mai lava i lalo o fa’i, ae afai o oe lava o le Lufilufi, e iloa atu lava o oe o le Lufilufi”.

E tai faapena le uiga o le tagata ua fai ma so’o o Iesu, e le tau aoao atu ma faatonu atu e susu mai i tua, ae o le so’o ua tuutuu i le loloto le tofa male uta. A laititi a la le tou faifeau e tuu ai pea lava la le faifeau matua e nofo i tua?

Ioe – e le na o le a’oa’o ma poto i tulafono ae tāua tele le a’oa’o ma ola ma faatino i le va nonofo ai ma isi tagata; le faatinoga ma le olaina lea o le feagaiga fou na fetalai ai le Alii ia Ieremia, “…a’o lenei le feagaiga ou te osia ma le aiga o Isaraelu..ou te tuuina la’u tulafono i totonu ia tei latou, ma ou tusi ai io latou loto, e fai foi a’u mo latou Atua, oi latou foi e fai mo’u nuu…auā ou te faamagalo ia latou amioleaga, ma ou le toe manatua ia latou agasala”. Ieremia 31:33-34.

Ia tatou vaai manino i le maliu o Iesu i le satauro ma lona toetu ma le auina mai o le Agaga Paia. Leai se uiga o le taulagi o le ta’u o le soo o Iesu ma le kerisiano ua leva ona tautua, ae le mafai ona faatino le uiga o le feagaiga fou ua aumai e Iesu i le soifuaga faaletagata. Tele manuia ua aumai e le feagaiga fou lea a le Alii mo Samoa ma ona tagata; tatou matuā faafetai ma ta’uta’u e le aunoa le viiga o le Alii i lou soifua auauna ma tautua mo Iesu ma lana ekalesia; ‘ā faa-faigata vaai i galuega a Faifeau na iloatino i lo latou soifua auauna le alofa ma le agalelei aumai o le Atua mo tagata uma, faapea le ola ua faapaia atoa mo le Atua ma lana Talalelei. Ia ta matuā faalatalata i le Alii ma le faatuatua ma le loto faamaoni - e fua mai i fua lelei lo ta ola faatuatua i soo se tafa ua valaauina i ai le ola; faailoa atu i lou ola ma le soifua le galuega faafou a le Agaga o Keriso. ‘Aua se iloga e maua ai se mea ona faatoa alofa lea – ‘aua le faatau alofa ae ia alofa ma agalelei ma le loto fuatiaifo; ina tutu ia i luga e tau mo Iesu manu o ao, e na te aumai lona mana e taitai tonu tatou e faia pea lona finagalo i aso o totoe o lo ta ola.

Ia tumau pea i le Atua lona lava viiga e faavavau. Ona o Iesu, Amene!

                                                                                                                       Anzac Tuala FS (Ofisa Failautusi Aoao)

                                                                                                                                                                             ………………………………………