FEAU O LE VAIASO!

(Message of the week)

Tusi Faitau: Fa'amasino 2: 6-19 

Matua: Faamasino 2: 19 "A ua oo ina oti o le faamasino, ona latou liliu ai lea, ua sili foi lo latou leaga i o latou tamā, ina ua latou mulimuli atu i atua ese e auauna i ai ma ifo i ai. Ua latou le tuua a latou amio ma lo latou faalogogatā."

Manatu Autu: "Faagaloina ma le manatuaina." 

                          "Forgetting and remembering."

E iai le isi toeaina matua e fai ma lana masani, o le alu ma ave lana tama’i api (notebook). E tuu lava i totonu o le taga o lona ofu. O le faamoemoe, a oo ina manuia ma lelei lona aso, ona tago lea o le toeaina ma faamaumau lelei i lalo, le lisi o mea lelei ma le mananaia sa tutupu, fai mai le toeaina, o meaalofa ma manuia mai le Atua. Peita’i a oo i aso e lutaluta ai le tai, tutupu mai fita ma faigata ona tago lea o le toeaina i lana tama’i api, ave i fafo ua faitau. Faitau ma le faamoemoe, faamanatu mai pea le toeaina, le alofa ma le agalelei o le Atua, o le mea mautinoa, e le mafai lava ona tuulafoaina e le Atua le tagata faatuatua. O loo iloa lelei e le toeaina lenei, o le isi pona o le tagata, o le lē manatua. Auā o le isi lava lea vaivaiga masani o le tagata, o le lē manatua, po o le galo.

O le vaivaiga masani foi lea o le nuu nei o Isaraelu. Lea foi o loo atagia i se vaega o le Mataupu lenei e 2 o le Tusi o Faamasino. Se nuu lava a ola magalogalo. E na ona leua ane lava, galo, emo ane, ua faagalo.  E manatua nei galo taeao. E manatua taeao, galo le vaiaso fou. O lea ua maliu Iosua le auauna a le Atua. O ia na sosoo le galuega faa-ta’ita’i mo le nuu i le Nuu Folafolaina ina ua mavae atu Mose.  Ua uma foi ona tuumavaevae fanua mo ituaiga o Isaraelu, galulue ai ma manatua ai pea le alofa o le ATUA mo Isaraelu lona nuu filifilia. Peitai, e na o sina taimi lava e lelei ai Isaraelu, ma manatua le Atua, toe foi a lea i le fai o le agasala ma le amio leaga. E na ona mavae atu lava Iosua, ma latou faamasino, toe foi lava lea i le taaviliga o le lalolagi o le lelei ma le leaga. Fai mai le Matua; “A ua oo ina oti o le faamasino, ona latou liliu ai lea, ua sili foi lo latou leaga i o latou tamā, ina ua latou mulimuli atu i atua ese e auauna i ai ma ifo i ai. Ua latou le tuua a latou amio ma lo latou faalogogatā.”. Talofa e i le Atua. A lailoa le ATUA, aemaise o ana auauna filifilia e faamanatu pea ina manatua ma manatua pea e le Isaraelu, o le Atua o loo auauna ai, o le Atua Alofa, le Atua Silisili ese, le Atua malosi o le Atua Puleaoao. E leai lava se isi atua e faatusalia ma fiatalavā ile Atua lea. O le Atua moni e toatasi, o le Atua o le manuia , saogalemu, ma le pogai o le ola. Faamoemoe o le ATUA, aua nei alu pogisa le Isaraelu, aua foi nei alu lē malamalama ile Atua, a ia alu ma le mautinoa, talitonu ma le faatuatua, e leai a se isi atua e pei o lona Atua. Le ATUA SILISILIESE. E fai ma ala e talitonu ai, ma tumau ai, faalogo ai ma usiusitai, faia lona finagalo, lē toe galo ai le Atua. E tau tuumai le galo ma le faagalo o se isi lava mea o le olaga, nai lo o le galo o le Atua. O lea ua soloai mai le tupulaga fou ma ua sili atu le leaga i o latou tamā, ua lafoai le Atua ae ua auauna ma ifo i atuaese. E matuā matautia le mea nei o le galo o le Atua. E lē lelei. Aisea?  Leaga o lou faagalo o le Atua, o lou faagalo lava lea o Galuega Lelei ma Vavega tetele sa faia e le Alii le Atua mo oe. Ua galo ia Isaraelu, le alofa faaola o le Atua, lea sa faasaoloto mai ai nai le nofopologa ai i Aikupito, ae a le 40 tausaga o taavao ma molimau i vavega e tele o le alofa laveai o le Atua? O le faagalo o le Atua, o le galo lava lea o le Feagaiga ua uma ona osi ma le Atua. Isaraelu o le lupe sa fa’ia ma le fuifui, mo le faamoemoe o le Atua. Fai oe ma o’u nuu, fai a’u ma outou Atua. O le faagalo o le Atua, o le faagalo lava lea o le natura o le Atua. O lona paia ma lona mamalu, o lona malosi aemaise o lona alofa tunoa.

O le savali lea o le Talalelei mo tatou. Talosia ia o mamao i tatou ma le mea nei o le faagaloina, ae ia na o le manatuina. Faamanatu mo tatou, manatua ma faasoa atu le Talalelei o le alofa laveai o le ATUA i le lalolagi. Faapea foi nai mea laiti sa faia ma alofa atu ai le isi ou uso ia te oe? E a? o e manatua? Manatua vavega ma galuega na faia e le Atua mo lou soifua ma lo tatou ola. Mo lenei vaiaso. Tusi i lalo ni mea lelei na fai e le Atua mo oe. Faasoa atu lena mea lelei i le isi ou uso. Pese ai. Tatalo ai. Ia avea tatou ma tagata e musu e faagalo, leaga o le Atua e le mafai ona faagaloina i tatou. E saili mai lava le Atua, e ala i lona alofa tunoa, ina ia faaolaina tatou lana fanau faalogogata. A lea ua tatou maua le Faaolataga, ina ua toetu manumalo mai le Keriso nai le oti ma le tuugamau.

Tumau ile Atua le viiga e oo ile faavavau. Amene!.     

                                                                                                           - Rev. Niutuiatua Onesemo. (FS)   

                                                                                                                                                                  ……………………………………….........