Tusi Faitau: Iopu 42: 10-17 

Matua: Iopu 42:12. "Ua sili foi ona faamanuia e le Alii o le gataaga o Iopu i lona amataga; ....." 

Manatu Autu: "Toe faaatoatoaina." 

                           "Restoration."

O ananafi o puapuaga o Iopu. O nei o le toe faaatoatoaina o le aiga o Iopu. Toe faaatoatoaina, o le toe fausia poo le toe faafoi lea o se mea i lona atoaga, e pei ona sa i ai muamua i le amataga. E maua gatā ia o avanoa e toe faaatoatoaina ai se mea i lona lelei sa i ai muamua. Ae i le soifuaga lenei, o le taimi lava e afaina ai le maopoopoga ma le manuia o se tataga, e taumate lava pe toe maua mai, pe toe foi i se lelei. O le tala na faitauina nei, o le tala ia Iopu ma lona taunuuga. Ae sa o tatou  faitau ma faalogologo i le aso ananafi - i puapuaga o Iopu. O le auauna sa ola mata’u i le Atua. O le tagata e matautia le amiotonu, o le tagata foi e numera tasi i le faatuatua. E i ai lana fanau, sa tele foi lona tamaoaiga sa i ona lima. Ae ina ua oo i ai ma’i faigata i lona aiga, o inā sa tuufesili ai loa ana uo ma lona toalua, pe toe foi i se lelei Iopu.

Ua tatou iloa ma outou silafia uma lava le tala. Ae o le mataupu lenei e 42, o le iuga lea o le tusi a Iopu. O le taunuuga foi lea o mea sa tutupu i le tala. O le taimi lea ua tali ai le Atua ia Iopu, ma tali atu ai ma le mau fesili sa tuufesilisili ai lona to’alua ma ana uo. Fuaiupu 10-17 e pei ona faitauina, ua mae’a ona tatalo Iopu, ona toe faaa’e ai lea o lana tafeaga e le Atua. E le faapea ua faatafea ona o sana amio ua le tonu, ae na mafua ona oo Iopu i ia tulaga, ona o le finagalo o le Atua. Faimai le matua - Ua sili foi ona faamanuia e le Alii o le gataaga o Iopu i lona amataga. O le toe faaatoatoaina lena o Iopu e le Atua. Faimai ua sili atu nai lo le mea sa i ai muamua. O lona uiga - E moni e taua le amataga o se mea, ae sili atu ona taua lona taunuuga. Sa lei mafaufauina e Iopu se taunuuga faapea e oo i ai ia ma lona aiga. Peitai o le tali mai o le Atua i lona lava taimi ua ia silafia, o inā ua sili atu ai mea ua mauaina e Iopu, nai lo mea sa i ai i lona amataga. Ua le tasi, le lua, ae ua atulasi. Ua le gata ina faateleina lona tamaoaiga, ae ua faaopoopo foi ona tausaga, a o lana fanau ma lona auaiga.  Ioe, Ua mavae atu matagi ma afā, ae ua tafa mai ata o taulelei. E manatu le faatauvaa, o se fafagu lea a le talalelei mo le tatou ofisa i lenei taeao, auā foi fe’au ma galuega amatalia o lenei vaiaso. Ua faamanatu mai pea ia i tatou, poo a lava faigata e feagai ma i tatou a’o tautua ai lana ekalesia, ia tatou maua pea le onosai ma le faatuatua i le Atua. Pei ona malie i suaga a nisi, ososai i le onosai a Iopu. Auā e galo lava tiga o mea uma, pe a oo ina toe faaatoatoaina i tatou e le Atua, i ona manuia e tele. Leai lava se isi malosi na te mafai ona faamaopoopo ma toe faaatoatoina le tagata, ua na’o le Atua lava. O manuia mai le Atua, e sili atu nai lo o seisi lava manuia faalelalolagi nei. Auā o manuia e augā tupulagā, e oo lava i le gataaga. Ua a’oa’o mai foi le talalelei, e le o tiga uma e oo mai - e afua ona o so tatou faatamala.... a’o tiga ua tapena, ua faatupu ma faama’ite e le Atua, ina ia toe faaatoatoaina atili ai i tatou, i ona manuia e tele o mulimuli mai. E le iloa le nanamu ma le manogi o le lau tigamoni, pe a le nutiina pe mili i o tatou lima. Le a le uiga o ia upu... E le iloa le loloto o i ai lou ma lo’u faatuatua, pe a le ui mai i mea faigatā o le ola nei.

Uso e, tuagane ia Keriso, ia tatou maua pea le loto onosai ma le faatuatua i le Atua, pe a lutia, pe taia foi i tatou i faigata ma faafitauli o le galuega, onosai a i le onosai a Iopu. Ae aua le taia loa, faamaamulu mai, faamavae mai, ua sisii lima. Ae ala foi ona mamafatū faafitauli, ona e i ai le Elifasa, e i ai le Eliu, e iai foi le toalua o Iopu - lea e tau faaosooso mai ia i tatou i le galuega. Upu ua masani ai le atunuu - e le o le lauamanu, a’o le faamuli o atu. E le o le amataga, a’o lona taunuuga, e ao ina tulimata’i pea e le tagata ua mausali le faatuatua, le tagata e lava le onosai ma mauaa le ola talitonu - e leai lava se mea e faigata i le Atua

O Iesu Keriso, o le alo o le Atua ua liutino tagata. Na afio mai o ia i le lalolagi e ala i lona maliu ma lona toetu manumalo i le oti ma le tuugamau, ina ia faaatoatoaina ma faaola le lalolagi agasala, pe a tatou talia o ia i le salamō ma le faatuatua faamaoni. Manuia tele feau ma galuega o lenei aso ma lenei vaiaso. Tumau pea ia te ia lona lava viiga nei, seia oo i le faavavau, faavavau lava. Amene.

Eleni Iose-Leleimalefaga.  

.............................................