Tusi Faitau: Roma 14: 13-23 

Matua: Roma 14:17-18. "Aua o le malo o le Atua, e le o mea e 'ai ma mea e inu; a o le amiotonu, ma le filemu, ma le olioli i le Agaga Paia. Aua o le ua auauna atu ia Keriso i mea uma, ua fiafia i ai le Atua, ua ta'uleleia foi o ia e tagata." 

Manatu Autu: "Aua le tuu se mea e tautevateva ai le isi." 

                          "Do not cause another to stumble."

O loo tatou iai pea i le faitauga o le tusi o Roma, ma le feau taumomoli a le Aposetolo o Paulo i le Ekalesia. A’o iai pea i fa’afitauli, ō fete’ena’i ai tagata Iutaia ma tagata o Nu’uese, ua faigata ai ona mafuta fa’atasi, i le loto e tasi. O le fēese’esea’i lea o talitonuga, ua lē mafai ai ona taula’i ō latou fa’amoemoega, i le feau fa’amafanafana o le Talalelei. Ua tele ina latou fa’amasino ma tausuai i mea e leaga ai le isi uso a tagata, ae ua galo ai le agaga moni o le ola talitonu i le Atua. Ua fa’atupula’ia ai le fēvaevaea’i ma le fēlotoa’i o tagata, i mea e manatu e es’ese ai o latou taofi.

E fa’apea se ata o loo aumai e le mataupu e 14 o le tusi i Roma, sa faitauina. O le apoapoa’i ma le faamalosiau a Paulo, ina ia ō mai fa’atasi le Ekalesia, e tūtū fa’atasi i le loto e tasi, e manuia ai le faamoemoe. Ua tele ina manatu fa’apito ma tusitusi lima tagata, i le ala e fa’amasino ai e le isi i le tasi. E ta’ufa’atauva’aina ai ma tu’u maulalo le soifua tapuai ma le ola talitonu o tagata, ona o le manatu o isi. Fa’apei o tulafono i mea e ‘ai, o loo tauave ma fa’amamalu e le au Iutaia. E manatu ai o mea’ai o loo tausisi iai, o mea ia ua fa’amamaina, a ua tausuai i mea’ai o loo fa’aaoga e isi tagata, e lē tusa lea ma le tulafono. A ua fai ma ala e ta’uleagaina ai le soifua talitonu o tagata o Nu’uese. O sē avega mamafa lava o tauaveina lea faiga, e tautevateva ai le fa’atuatua o tagata i le Atua.

Fai mai Paulo, “afai ae fa’atiga lou uso i au mea e ‘ai, ua e lē toe amio alofa.” E te lē toe manatu i se mea e manuia ai oe, fa’atasi ma le isi ou uso, auā ua ē tā mau i le tulafono, ae galo ai le a’oa’oga i le alofa tunoa o Iesu Keriso. O loo faapea mai foi, “‘Aua le fano i au mea e ‘ai, aua o ia, o lou uso, o le tagata ese, ua tu’u esea fo’i o ia, o ia le na, na maliu ai Iesu Keriso.” O le ala e maua ai le maopoopoga ma le nonofo lelei o tagata, o le mafuta fa’atasi. O le agaga lea, e maua ai sootaga vā vā lalata, o le nofo lelei ma le fēlagolagoma’i. Ae o le ata manino foi lea, o le fa’aaloalo maualuga, e amanaia ai le isi uso a tagata, e talia ai lē ua tu’ulafoaina, faapea le tagata pagātia ma le taotaomia.

E fa’amalosia’u ai i le tagata o vaivai le fa’atuatua, e iloa ai, o loo iai le agaga o le Alofa e liliuina ai loto, i lē o mo’omia le fesoasoani. Ina ia lagona le sini autu ma le faamoemoe o le finagalo alofa o le Atua, ina ia mafuta fa’atasi tagata. Fai mai upu o le matua sa faitauina, “17. Auā o le malō o le Atua, e le o mea e ‘ai ma mea e inu; a o le amiotonu, ma le filemu, ma le olioli i le Agaga Pa’ia. (18) Auā o le ua auauna atu ia Keriso i mea uma, ua fiafia i ai le Atua, ua ta’uleleia foi o ia e tagata.” O foliga va’aia lea o le mālō o le Atua, ma lona finagalo o fa’ailoa e le Aposetolo o Paulo. E lē o le fa’amasino atu i tulafono, i le ‘ai poo le inu e fa’aolaina ai le agaga. Ae o mafutaga osiosi lelei i le fiafia ma le olioli, ma le auauna atu i le Alii o Iesu Keriso. Ina ia maua le filemu, ma faia le mea e aupito sili ona amiotonu ma lelei. E fiafia ai le Atua, ma ta’uleleina ai o ia, e tagata.

O le feau fa’amanatu lea o le talalelei mo i tatou i lenei aso, ma lenei vaiaso. O le ala e tatou te malolosi ai ma tumau i le Alii, o lo tatou galulue fa’atasi ma mafuta fa’atasi. Ia fēlagolagoma’i ma fa’asoa i auala e manuia ai, le faamoemoe auā le savaliga fa’a-le-faatuatua. Ia auai le Agaga o le Atua, e tauto’aluaina le faamoemoe o le Ekalesia, i ana feau ma galuega o fa’aaogaina ai lou soifua ma lo tatou ola.Ia maua pea le fiafia ma le olioli tatou te auauna ai ia Iesu Keriso i mea uma ua lelei. Auā e fiafia mai ai le Atua ma ta’uleleia ai i tatou i lona finagalo Pa’ia. ‘Aua ia le fē’ese’esea’i ō tatou manatu ma lagona i le ala e tu’umaulaloina ai le isi uso a tagata. ‘Aua foi ne’i tausuai ma faia se leaga e tautevateva ai se tasi. A ia maua le Agaga o le Atua, tatou te mafuta fa’atasi ai, ma auauna ai i lona lava finagalo ma le fa’amaoni.

O Iesu Keriso lava ia, na tapenaina le ala, tatou te maua ai le mafutaga mafanafana ma lona Tamā i le ola faavavau, pe afai tatou te talitonu ma fa’atuatua i te Ia e ala i lona alofa tunoa.

Ia tumau i le Atua poto lona lava viiga, nei ma aso uma e oo i le faavauvau, faavavau lava. Amene. 

Viliamu Sialeipata (ANA)  

...........................................