Tusi Faitau: Roma 11: 13-24 

Matua: Roma 11:17-18. "Afai foi na gaui ese nisi ona la, a o oe o le olive vao, ua faapipiiina oe ia faatasi ma i latou, ma ua tofu faatasi ma i latou i le pogai ma le sua o le olive, aua e te faasiasia i ona la; afai foi e te faasiasia, ia e manatu ua le ola le pogai ia te oe, a ua e ola i le pogai." 

Manatu Autu: "Faapipiiina i tagata o le Atua." 

                          "Grafted into God's people."

"Faapipiiina," o le faamoemoe, ia mau lelei, ia maua'a, ma ia mausali. E leai se e toe mamulu ese, ae ua afisi ma faamaoopoopo, ina ua tasi le loto, mafaufau, ma le agaga, o tagata o le Atua i tatou uma.

E foliga faapea se lagona o lo o fofola atu e le aposetolo o Paulo, i kerisiano o i Roma, e pei ona i ai le vaega o lana sa faitauina. Sa naunau Paulo e fia mafuta ma nai kerisiano ia, peitai e le'i maua se avanoa, ona tusi mai lea o lana tusi lea ao i ai i Korinito.

O le tusi e faailoa ai le amiotonu a le Atua, e ola ai soo se tagata pe a faatuatua i le faaolataga a Iesu Keriso. Mo Paulo, o le amiotonu a le Atua, e ala mai lea i lona alofa tunoa, ua aofia ai le Iutaia faatasi ai ma nuu ese.

Peitai ua le o lea; Ua logotala Paulo i vevesi. Ua le maua se nofo lelei ina ua faualuga le Iutaia ma faapea ane, ua na'o i latou lava ma le Atua. Ua tusi le lima ma faatusatusa poo ai e sili. Mo Paulo, e le sese le finau a Iutaia, peitai, ona o le le usita'i o le nuu o le Atua i le Feagaiga Tuai, o le ala lea o le saili mai o le Atua i lona alofa tunoa, e ala i le faaolataga mo tagata uma, o e ua faatuatua.

O lona uiga, ua tutusa tagata uma i le silafaga a le Atua. E tatau ai ona tasi le loto, tasi le mafaufau, tasi le agaga. E ui lava ona o le Iutaia na tofia anamua e le Atua, ao le tagata nuu ese, o le olive vao na faapipii atu i ai, o le mea ua mautinoa, e tasi lava le pogai, o le Atua lea.

Lea e pei ona i ai upu ua fai ma matua, o le tagata nuu ese o le olive vao, ua faapipiiina faatasi mo le Atua, e pa'ia mo le Atua, ua faapolopoloina foi mo ana feau. Faimai Paulo, afai ua faapipiina le olive vao i le pogai ma la o le olive lelei, viia le Atua i lea faaeaina, ae aua nei faamaualuga ai pe faasiasia ai i isi.

Le mamalu o le au faitau i lenei taeao, o le feau foi lea o le talalelei mo i tatou uma. Ua taoto lava le feau a Paulo e ala i lana tusi ia Roma, ona o nai faafitauli sa tau fofo i na vaitau, o le tau amataina o le ekalesia. Lea ua salalau le talalelei, na fitaituga i ai nai tuaa ma matua ua fuli mai o latou tua, lea foi ua tatou galulue e faaauau le talaiina o le alofa tunoa o le Atua, ua ola ai tagata faatuatua uma.

O le faapipiiina o le tagata agasala ma le le auga i le aiga ma le fanau a le Atua, o se faaeaea maualuga. Ae o le tagata ua aofia i totonu o lona aiga, e tatau ona paia mo lana Afio ma ana feau. O lo tatou ola ua amanaiaina e le Atua, e ala i le faaaogaina i totonu o lana ekalesia, ia maua pea lo tatou agamalu ma le loto maulalo. O tiuga ma aga ia faale-Atua e iloga ai lana fanau.

O le Atua lava le pogai ma le afuaga o lo tatou ola. malosi, poto ma le atamai, faapea manuia ua tatou aeae ai. O le tali atu a le tagata ua pipii mau ma mausali lona soifua i lana faaolataga, o le tausi o le va lelei ma le isi, ma ia atagia i le ola, o i tatou lava ua faapolopoloina e fai ma ana auauna, i soo se valaauina ua ia finagalo i ai.

O Iesu Keriso, o lo tatou Alii ma le Faaola. O lona soifua paia, na ofoina mai ona o le alofa tunoa o le Atua, ua faapipiiina atu au lo tatou le auga i lana Afio. Na maliu Keriso, tanumia i le tuugamau, ao lona toe soifua manumalo, ua maua ai e i tatou uma le avanoa i lona malo e faavavau.

Ia tumau atu pea i le Atua le viiga, nei, ma aso uma lava, seia oo i le faavavau. Amene. 

Faafou Leuta  

........................