CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: 2 Timoteo 3:1 - 17

Matua: “¹⁶O Tusi Paia uma lava..¹⁷ina ia atoatoa ona lelei ai o le tagata o le Atua, ia saunia lava ia i galuega lelei uma lava.”

Manatu Autu: Faapotopotoga o e uma ua faatuatua (Community of all believers)

O le Aso Tofi lenei e faailoga ai le Afio A’e o le Alii o Iesu, e pei ona faamauina i le Galuega 1. E faailogaina i le 40 aso talu mai le Aso Sa o le Toetu “³e fagafulu po ua iloa ai o ia e i latou.. ⁹Ua fetalai atu Ia i ia mea, ona siitia lea o Ia, o latou o vaavaai atu; ua avea foi o Ia i le ao nai o latou luma. ¹⁰Ua latou tulimata’i a’e i le lagi, a o afio a’e o Ia…¹¹ “O Iesu lena, ua aveina a’e nai ia te outou i le lagi, e faapea ona toe afio mai o Ia, pei o lona afio atu i le lagi na outou vaavaai i ai.”  O le a se tāua o lenei Afio a’e o Iesu? Ua uma le galuega na afio mai ai, ua manumalo ma ua pule aoao. Ua toe foi o Ia, e nofo i le itu taumatau o le Atua le Tama, e fautua mo le faapotopotoga o e faatuatua. Ma e pei ona afio a’e o Ia, e faapea foi ona afifio a’e le au faatuatua uma, pe a uma la tatou tautua ma le molimau i le Tala Lelei i le lalolagi nei.

O le Tusi faitau o lenei aso, o loo mafuli i le faamatalaina e le aposetolo o aso faigata, i ona aso e gata ai, ma ituaiga tagata fai mea leaga e tetee ai i le Tala Lelei. (E te faitau i ai, i le tele o ou taimi avanoa, ona iloa lea o le auiliiliga o nei ituaiga tagata leaga ma mea leaga eseese). E lē o se mea fou foi lenei tulaga, na amata mai lava i le amataga i Etena le tetee o le tagata i le Atua ma ana fuafuaga lelei, faasolo mai se’ia oo ina afio mai le Alii o Iesu na latou faasatauro, oo mai i taimi o le aposetolo na latou faafalepuipui, e oo mai nei lava, seia aulia aso e gata ai.

Ona fai mai faalua lea o Paulo ia Timoteo, “^{10 & 14} A o oe...”  O nai ona moomooga faalupe o eleele naumati, ia tumau pea le atalii po o le uso a auauna, i le upumoni, le faatuatuaga ia Iesu Keriso, faatasi ma le ituaiga amio paia ma le ola mamā, le ola molimau ma le auauna faamaoni i la le Tala Lelei. O le manatu o Paulo, e mulia’i ni lauga ma a’oa’oga e fai atu i le Ekalesia, a ia avea le amio ma le olaga o aso taitasi, e fai ma lauga leotele i le faafofoga, a o se feau manino i le vaai  a tagata. Auā o se feteenaiga lea ua taatele i nisi o le aufaigaluega folafola o le Upu i nei aso – tautala ma le fa’aaloalo – ina ua maoa’e le masausau o lauga ma le faamatalaina o mataupu silisili, a e feteena’i ma le pa’ū maualalo o le amio ma le olaga o aso fai soo.

Ua faamanatu atu e le aposetolo le punavai e tumau ai pea le ola maloloina faaleagaga ma le malosi lilo o le tagata faatuatua, o le Tusi Paia lea. O afioga paia a le Atua na faamaite, faailoa ma faatonu e le Agaga o le Atua, ina ia poto ma atamai, e a’oa’o a’oa’i faatonu ma faapoto ai le amiotonu, e atoatoa ona lelei ai le faapotopotoga o tagata faatuatua i le Atua, e saunia ai mo galuega lelei uma. O ai le faapotopotoga o le au faatuatua? “¹²O i latou uma foi o e loto ina nonofo ma le amio Atua ia Iesu Keriso..”  Ua tuufaatasia e le aposetolo tagata uma, ina ia aofia i le aiga e tasi, o tagata faatuatua ia Iesu Keriso. O ia, ma Timoteo, o le au aposetolo uma, o le Ekalesia i Efeso ma Asia atoa, o kerisiano i Kalatia, Maketonia ma isi, o Iutaia ma nuu ese, o Eleni ma Roma ma le lalolagi atoa. E tau fai molimau ma ositaulaga le tagata i lona lava lotoifale, o oe i lou nuu o a’u foi i lo’u, i ou lava tiute ma la’u ia galuega, a e o i tatou uma o le tino e tasi ia Keriso, o le faapotopotoga o e ua faaolaina e ala i le faatuatua, i le maliu ma le toetu o lo tatou Alii Faaola e toatasi. Ia ia te Ia le viiga. Amene..

Faitoaga Tolua (FS) 

.………………………………………