CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Roma 14:13-21.

Manatu Autu: Ia amanaia e le tasi le tasi. Be considerate of each other.

Matua: fuaiupu e 13.

O lenei ‘aua nei fefa’asalaai, ae lelei ina ia manatu i lenei lava mea. ‘aua nei tuu ane e se tasi se mea e tausuai ai, po o se mea e tautevateva ai lona uso,

Ua silafia lelei e le aposetolo o Paulo o le tasi lenei o faafitauli o loo tupu pea ma avea ma vaivaiga o le toatele o le ekalesia i Roma, o le feaina’i ma felotoa’i ona o le eseese o taofi i mea e ai ma isi talitonuga.

Ae le gata i lea o le vaivaiga o le au kerisiano Iutaia e mafuli tele i le tusitusi lima ma leaga loto i nai kerisiano nuu ese ma o latou faualuga ai o latou lava o loo i ai le sa’o ma le atoatoa o le Talalelei ia Iesu Keriso ma le Faaolataga.

O lea la ua faasa’o e Paulo le vala lea, e le o le ai po o le lẽ ai, a o le Alii. Pe tatou te ola pe tatou te oti, o tatou uma lava o tagata o le Alii. E tatou te laulaututu uma i luma o le nofoa faamasino o Keriso ma faamatala le tatou amio i le Atua.

O le Malo o le Atua, e le ole tino, a o le loto ua i ai le amiotonu, filemu ma le olioli faamaoni i le Atua. O lona uiga e le aoga le faailoga tagata, a ia amanaia ma tausi le nofo lelei ma tagata uma o loo i o tatou siosiomaga.

Ua taatele lava le vaivaiga lenei i totonu o le tatou atunuu, aemaise i le au maumea le vaai maulalo ma faaaoga le malosi o nai tagata vaivai ma matitiva e saga saili ai o latou manuia.

Ua oo foi lava i totonu o nuu ma aiga ua aafia ai foi talu le pule soona fai a nisi o Sa’o ma matai i fanua ma suafa o aiga ua le amanaia le auaiga talu le manatu faapito tau o ia ma lana fanau e manuia ai.

O lea foi lava ua vaaia i totonu o Ekalesia eseese le lẽ amanaia o leo o nai tagata lotu talu le faamalieina o mea e mananao ai nisi o le Aufaigaluega a le Atua ma ua avea ma auala ua tele ai lava le sosia ma le tamaoaiga o le Faifeau ae o loo tau auau nai seleni a le tagata tautua lotu.

O lea ua faamanatu mai le aposetolo, e le o meaai poo le tamaoaiga le faamamafa o le ola, ao le faia o le amiotonu ia maua ai le filemu ma le olioli o tagata uma.

Ia faatupu e le Agaga Paia o tatou loto e fai ai ma le amiotonu o tatou tiute ma valaauina eseese ma le filemu ma le faamaoni. Ae sili ona tatou amanaia nai tagata matitiva ma vaivai o latou faasinomaga.

O le faamoemoe lea ole Atua mo tatou uma lana fanau, ia tatou ola fetausiai ma alofa le tasi i le tasi e pei foi ona ia alofa mai i aso uma e le aunoa e ala i le malosi ma le ola.

Ia manuia tele le aso fanau o le 180 tausaga o le Kolisi Faafaifeau i Malua  ole ioimata o le Ekalesia i le aso ananafi. E le galo oe Malua.

Manuia faiva o lenei aso. Amene.

Onosai Nofoaiga (FS) 

.………………………………………