CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau:    2 Timoteo 4: 9 – 22

Matua:            “²²Ia i ai i lou agaga le Alii. Ia ia te outou le alofa tunoa.”

Manatu Autu: Faamanuiaga Faamavae (Farewell blessings).

O loo tusia i le maa faamanatu o Malietoa Vainuupo o i Sapapalii, upu o lana Faamanuiaga Faamavae mo Samoa e faapea: O le a ou alu ifo i le tuugamau ma paia ma mamalu faaleatunuu, a e tatou tupu tasi ia Iesu Keriso ma le Tala Lelei. O upu taumavae ia a le Tafaifā na ia talia le oo mai o Ioane Viliamu ma le talaiga ia Iesu Keriso; o le mavaega o loo momoli faatasi mai ai ana faamanuiaga mo le atunuu pele, a o moomooga ina ia avea pea Samoa ma atunuu kerisiano faatuatua ia Iesu, seia aulia Lona toe afio faalua mai.

O loo molimau le Tusi Paia i taumavaega a ta’ita’i iloga, o augatamā, o tupu ma le au perofeta o le nuu o le Atua, pei o Aperaamo, Isaako ma Iakopo, Mose, Samuelu, Tavita. O toe saafiafiga faatamā, e faae’e atu ai faamanuiaga i le isi augatupulaga, ina ia saomauli lo latou alo faiva, i le avea ai ma nuu filifilia o le Atua. O upu taumavae ina ia tausisi pea i ala ua uma ona a’oa’oina ai, o ala faaleatua ua faatulafonoina, ia mamalu ma paia o latou ola mo le viiga o le Atua. Ma o loo molimau lo latou tala faasolopito, i taualumaga uma, i ona lelei ma ona lape, seia oo ina afio mai le Mesia e faaola le lalolagi atoa, o lo latou lea valaauina faapitoa.    

Ua taualuga mafaufauga faaleagaga mo lenei vaiaso i upu taumavae a le aposetolo ma ana faamanuiaga mo le atalii faifeau, tainane le au faatuatua ma le Ekalesia i Efeso. Ma o upu apoapoa’i faamalosi’au lava sa amata mai ai, e oo mai i le faai’uga o loo tulitatao pea, ina ia manuia le ola molimau, manuia le galuega ma le Tala Lelei ia Iesu Keriso. A o loo faailoa atu ai ma lona faamoemoe e toe fia feiloa’i lava i la le tino, pe a tusa ma le finagalo o le Atua. O loo naunau i le fia maua mai o meafaigaluega, o ona ofu talaloa ma pa’u e tusi ai tusi. E ui ina ua matua ma afu le soifua, e ui ina tele fili ma sauaga, e pei ona faamauina le lisi o tagata tete’e mai i lana mau, a e lē faavaivai ai, e lē uma ai le fia galue pea mo le faalauiloaina o le Tala Lelei ia Iesu. O loo  momoli atu foi faamanuiaga ma alofaaga o le auuso i isi itu o le Ekalesia, o galulue ma le aposetolo, e saga faamafanafanaina ai Timoteo, ina ua iloa o loo talosia ma tapua’ia ona faiva e le toatele.

A o tatou aga atu i le Fono Tele o lenei tausaga, e fia ta’ua faapitoa ma le alofa le soifua auauna o tamā ma tina o le a Penisione i lenei tausaga. O susuga i Toeaina ma Faafeagaiga ma Faletua ua afu le soifua i le galuega faafaifeau tausinuu, ua aulia tausaga tapulaa e galulue ai, e tusa ma le Faavae. O Faamanuiaga Faamavae. E avea ai lenei avanoa ma lenei auala, e momoli atu ai faamanuiaga ma alofaaga mai le Ofisa Tutotonu o le Ekalesia, auā le afifio o le Laulau o le Fono Tele, o Ulu o Matagaluega ma le aufaigaluega a le Ekalesia, mo le au Penisione uma o lenei tausaga. Ua faamalo le molimau mo Iesu Keriso ma le Tala Lelei. Ua outou tau le taua lelei, ua i’u ia te outou le tausinioga, ua outou taofi le faatuatua. O lenei ua teuina mo outou le pale o le amiotonu, e foaiina atu ia te outou i lea lava Aso e le Alii le faamasino amiotonu; e le gata foi ia te outou, a o i latou uma lava o e fiafia i Lona fa’aali mai.  Ia ia te outou le alofa tunoa!

Ia manuia le Aso Sa o Tina. Ia manuia le Fono Tele a le Ekalesia. Ia i le Atua le viiga e faavavau. Amene.   

Faitoaga Tolua (FS) 

.………………………………………