CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Faamasino 6: 25 – 32

Feau o le Aso: Fesāga’iga ma atua ese (1). Dealings with false gods (1)

Sa le’i faigofie le fesagaiga a Kitiona ma atua ese o Mitiana, o Paala ma Asaira, lea ua tapuai i ai le toatele o lona aiga ma lona nuu atoa. Ua na soloia i lalo fata faitaulaga ma tupua o Paala ma Asaira, a e fausia fata e sili ona tetele mo lona Atua; ua na osi foi le taulaga mu i le Atua, sa fa’aaoga i ai laau o le fata faitaulaga ia Asaira, na ia talepe i lalo. Na o le toa sefulu ‘au a Kitiona na latou faia lea mea i le po, ona o le fefefe i tagata o lona aiga ma le nuu ua mulimuli uma i atua ese.

Ua iloa e le nuu ona latou o ane lea ia Ioasa le tamā o Kitiona, ina ia tuuina atu Kitiona e faasala i le oti, ona ua na lē anaana ia Paala. Peitai na faasaga atu Ioasa ua a’oa’i ua fai atu, “O outou na, tou te finafinau ea mo Paala? Tou te fia laveaiina o ia? O le na te finau mo ia, ia oti lava ia i le taeao nei; afai o se atua o ia, ina faia e ia lava lana finauga, auā ua soloia e se tasi lona fata faitaulaga.” O le aso lea na faamatai ai Kitiona ia Ierupaala, o lona uiga Ia la finau ma Paala.

E ui la ina faigata, a e na gaftia tiute o Kitiona na valaauina ai e le Atua, ona o le lagolago a lona tamā o Ioasa. E faigofie le taua faasaga i atua ese, ina ua tutū faatasi matua ma fanau, pei o Ioasa ma lona atalii o Kitiona. Ina ua lagolago le tamā ma le tina, i le taumafai o le atalii ma le afafine; ina ua lagolagoina e ta’ita’i se taumafai a tagatanuu, o ulu o Ekalesia e lagolagoina ni mau mai tagata lotu, e pei o le Toeaina e tutū faatasi ma faifeau ma a’oa’o ma tiakono, i le taumafaiga e soloia i lalo tu ma aga faapaupau, o atua ese o tu’inanauga i le ‘oa ma le mamalu.

Peitai, afai e taumafai atu Kitiona ma se toasefulu itiiti e soloia i lalo tu ma aga faaPaala ma Fa’aasaira, a e solomua Ioasa ma le au matutua e opogi ona e oloa lu’ulu’u ma mamafa ai le taga, ona faigata lea o le fesagaiga ma atua ese.

Ua tele foi isi ituaiga tupua ua si’omia i tatou, e pei o tu ma aga masani e fai i le suafa o le Atua, ma le igoa o le fa’aaloalo, a o ufiufi ai le mana’o i mea o le lalolagi; e pei foi o suiga tele vavave faatekonolosi e aogā, a ua televave faatasi ai ma faiga faapaupau faapaala ma amio inosia faaasaira. Aemaise le silafia o soliga tulafono, a e salu i lalo o le kapeta faalilo ai. O le tagofia o fualaau oona, le gaoi ma le fasi tagata, le amio pi’opi’o ma faiga faatupu mala, o sauaga matagā, e lē o ni faiga ia o a’oa’o mai e lo tatou Alii o Iesu, a o amioga faa atua ese, o atua faapaupau. O le feau faamanatu mai, ia tatou maua le loto tele faa Kitiona, le faatuatua tatou te faasaga atu ai e tetee ma faatoilalo faiga a le fili. O le fiafia faamasani e faitau le Tusi Paia, faamasani e tulivae i le tatalo i le ao ma le po, o nisi ia auala faigofie a e ogaoga, e tau ai le fitafita a Keriso, e fesagai ai ma ona fili. O auala na sa faatoilalo ai e Iesu le fili o Satani, ina o la’ua fesagai. Ia manuia lou alofaiva i le fesaga’iga ma atua ese i lenei aso. 

Faitoaga Tolua (FS) 

.………………………………………