CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Mareko 13:1-20

Matua:f11

“Pe a latou ta’ita’ina ma tuuina atu outou, aua nei muai manatu i sa outou e fai atu ai, aua foi le luai fatufatua’i, a o se mea e foaina ia te outou i lena ituaso, o lea tou te faiatu ai; auā e le o outou e faiatu ai, ao o le Agaga Paia.”

Autu: O se mataupu sili ona faanatinati. / A matter of extreme urgency.

O le mafatia ma le sauaina o tagata o le ala, poo tagata ua talitonu ia Iesu i le vaitau o tusitusiga a Mareko, ua manatu ai nisi o tagata su’esu’e o le Tusi Paia, o le Tusi a Mareko, o se tusi e faanatinati tele lona tusia ina. E faapea o le naunautaiga lava o le tusitala, ia vave oo le feau a le Talalelei i itu uma o le lalolagi. Ua saga faatupu lea manatu i se lagona, e faaselemutu foi le faai’uina o le tusi, lea e faapea ai nisi, o se faaopopo mulimuli ane le faai’uina o le mataupu e sefulu ma le valu.

Peita’i, e lē lagolagoina foi e nisi ma faapea ai, o se tasi lenei o Evagelia e matua lelei ona filitagaga le faasoloina o ona mataupu. E le soona alu solo, ae agai tonu ma faagatonu le tusitusiga, i le galuega faaola na afio mai ai Iesu, aemaise le tala i lona maliu.

Ui i lea, o le ogatotonugalemu o le tusitusiga a Mareko, o loo autu lelei lava i le manulauti, “O Iesu Keriso o le Alo o le Atua, o se auauna puapuagatia. (A suffering servant) O le mataupu sili lea o loo manaomia ona faanatinati, aua le lalolagi atoa.

O le faitauga ua filifilia o lenei aso, o loo faaulutalaina, “O le valoaga a Iesu i le faaumatia o le malumalu.” O lea lava ua lata le oo i puapuaga o Iesu Keriso, o le taunuuga o lona soloia lea i lalo o le malumalu tuai, ae auina mo tagata uma le malumalu fou. O le mea lea ua ia matua fautuaina ai tagata o lea vaitau, ina ia mataala, aua o le a oo mai faigata, ma o le a lē mautonu tagata uma e oo lava i le ogatotonu o aiga ma fesootaiga vavalalata.

Petai o faigata o ia mea uma, ua ia avatu ai se feau taua e pei ona fai nei ma a tatou matua. “Pe a latou ta’ita’ina ma tuuina atu outou, aua nei muai manatu i sa outou e fai atu ai, aua foi le luai fatufatua’i, a o se mea e foaina ia te outou i lena ituaso, o lea tou te faiatu ai; auā e le o outou e faiatu ai, ao o le Agaga Paia.”

E iai le lagona o se mataupu sili ona faanatinati lea e tusa o le autu o lenei aso, o loo finagalo ai Iesu mo tagata uma o lona vaitau. O lona finagalo ia sili ona faamoemoe ona soo ma tagata uma i le mana o le Agaga Paia, e mafai ai ona onosai ma lavatia puapuaga o le a oo ia tei latou. Ia mataala, ma faamoemoe i le Agaga Paia, e mafai ai mea uma.

E talitonu o se feau taua tele foi lea a le Talalelei mo i tatou uma ao aga atu i feau ma galuega o lenei aso. E iai le talitonuga o loo outou soifua ma o’u ola i le vaitau o le Agaga Paia, a o tatou faatalitali atu i le toe afio mai o Iesu.

O lona uiga, e taua tele lo tatou faamoemoe ma faalaolago i le musumusuga ma le ta’ita’ina a le Agaga Paia o le Atua, e manuia ai a tatou auaunaga uma. Faamoemoe ma faalagolago faapefea? Tatalo i taimi uma ma le faatuatua e aumai e le Agaga Paia le upu ma le faasinoga o mea uma, ma ia mataala.

O Iesu Keriso lava na ia faamoemoe i le auai o le Agaga Paia o lona Tama ma ia, a o iai o ia i lana galuega. Na tatalo ma le faatuatua ma ia onosaia ai le lalolagi leaga ma le agasala. Na oo lava i le oti ma le tuugamau, peitai, na toe soifua manumalo mai o ia ma saunia ai mo tagata uma le ola faavavau.

Ia tumau i le Atua lona lava viiga, nei seia oo i le faavavau, faavavau lava, Amene.

Kereveta Tiumalu (FS) 

.………………………………………