CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Luka 5:27 – 6:11

Matua: “O le tasi sapati ua ui atu ai o ia i tosaito, ona o’oti ai lea e ona so’o o ‘au saito, ua mili ai o latou lima, ma a’ai ai. Ona fai mai lea ia te i latou o isi o le au faresaio, “Se a le mea tou te fai ai le mea e sā ona fai i le sapati?” Ua fetalai atu foi o ia ‘ia te i latou, “ O le Atalii o le tagata, o le Ali’i lea o le sapati.”  (6:1–2,)

Manatu Autū:  O le Alii o le Sapati (Lord of the Sabbath)

E tolu (3) lelei tala o loo ta’ua ile vaega lenei o le Evagelia a Luka. Muamua o le faigaai faatasi ma tagata agasala. Lua ole faatauaina ole anapogi, ma le vaega mulimuli o le faamamaluina o le sapati.

Peitai o le aotelaga o nei tala, O Iesu o le Fomai mo e agasala, ole faamuamua le faasaoina ole ola. o le  Alii o le Sapati,

O le tausia ole Sapati na amata mai i lava i le tulafono e pei ona faamauina ile Tusi Paia ile Feagaiga Tuai. Fai mai; “Ia manatua le aso Sapati ia tausia ma ia faapaiaina” Auā e pei lava ona malolo o le Atua i le aso fitu ina ua mavae le foafoaga o mea uma, e faapea foi ona tatau ona malolo o le tagata i le aso fitu, le aso Sapati (Esoto 20:8–11; Kenese 2:2–3). Sa silafia lelei e le Atua le taua o le malologa. O le mafuaga lea o le matuā faasāina o se galuega e tasi ona faia ile aso Sapati.

O le tulafono foi ole aso Sapati e tusa ai ma tu ma aga masani a Iutaia, fai mai e oo lava ile o’otiina o le au ole saito po  o le pikiina o soo se fua mai se laau, sa faitauina uma lava ma ta’ua o le galuega, auā e mafai ona faapea, o le seleseleina lava lea. E faapea foi ile galuea’ina o le saito i lima o se tasi e tuueseese ai le saito mai le vao, o le galuega foi lea mea, ma e leai lava se eseesega ma le sasaina o le saito,  o galuega uma nei mau faatinoga. O lona uiga e lē alagatatau ona faia nei faatinoga uma ile sapati.  

O latou ia o le au Faresaio ma aoao o le tulafono, sa taumafai lava e saili se auala e molia ma tuua’ia ai le Alii o Iesu. Sa o latou maitau ma vaavaai ma le toto’a ia Iesu pe na te faia se faamalologa i le aso Sapati.

Ioe, o lea ua vaaia e le au Faresaio ia Iesu ma ona so’o, ua ui atu i le tosaito ile sapati, ma ua latou tuuaia ai le Alii ma ona soo, ua latou solia le aso sapati, ua faauiga sese e le au Faresaio le tulafono.e uiga ile sapati; le uiga lena o le matua. Fai mai;

“I le tasi sapati ua ui atu ai o ia i tosaito, ona o’oti ai lea e ona so’o o ‘au saito, ua mili ai o latou lima, ma a’ai ai. Ona fai mai lea ia te i latou o isi o le au faresaio, “Se a le mea tou te fai ai le mea e sā ona fai i le sapati?”

O le talitonuga lea o le Au Faresaio ma A’oa’o o le Tulafono, o le mea mautinoa lava, ua galulue Iesu ma ona soo ile aso Sapati. Ua solia e Alii ma ona soo le aso e tatau ona malolo ai ma ua lē faapaiaina. O se faatinoga matuiā tele lenei mea, e tusa ai ma tu ma aga faa-Iutaia.

Peitai, o le finagalo o le Alii o Iesu, e faamamafa ma faamuamua, le faatinoina o le galuega alofa mutimutivale. O le mea aupito sili lea ona taua, nai lo ole faamamapo ole tulafono o le sapati. E le mafai  ona taofia mai le faia o galuega lelei ma galuega ole alofa e fesoasoani ai iina ia faasaoiona le ola(faamalologa)o e o loo moomiale fesoasoani.  

Sa ta'ua e Iesu, Tavita ma lana aumalaga sa aai ma talia areto, ole faamuamua o mana'oga o tagata nai lo o tulafono o sauniga. Mo le au Faresaio, o le usitai i le tusi o le Tulafono e sili atu ona taua nai lo o le faia o le meatonu,  o le galuega lelei ma le alofa mutimutivale ma le faatuatua.. O le atoaga o  mea uma, ma le tulafono; O le Atalii o le Tagata o le Alii lea o le Sapati. O Iesu o le faaolataga mo e agasala,

E le faapea ua faalaogaina ma tauleaga e Iesu, tulafono ma  tusitusiga paia o le Feagaiga Tuai. Leai, o le faamomoe ia iloa e au Faresaio, ma aoao o tulafono. O Ia lava o le Keriso, o Iesu le  Alii o le Sapati, na afio mai  e faaola tagata uma ma sei toe faafoi tagata uma i le ala sa'o.

O le feau foi lea o Talalelei mo tatou. E taua lo tatou faamamaluina ma faapaiaina ole aso sapati. O le malologa e le gata mo le malosi faaletino, ae sili o se faasiliga o le malosi faaleagaga. O lona uiga, e sili atu le taua, o lo tatou faamuamua o le alofa ma faia o galuega lelei mo soo se tagata o moomia le fesoasoani e tusa lava foi po ole sapati. Aua o le finagalo lea o le Alii o le Sapati. O ia lava na faapaiaina ma faamamaluina lona aso e malolo ai. Peitai, e le mafai ona malolo galuega lelei, galuega ua finagalo le Atua e faaoo atu ai le malosi ma le ola, i le isi uso a tagata. 

Toatele le au Faresaio ma le aoao o tulafono i nei aso. O le latou galuega lava lea e fai, o le vaavaai masei, ma maitau se mea e sasi ma leaga ai le uso a tagata. E mapo mamalu, e amo le tofi, e fia tautala tasi, ae matua leai leai lava ma se alofa. E poto e tusi lona lima i o, ae le o iloa e tele lima la e faasaga mai ia te ia.

Ia o tatou lagona pea le lotomaulalo, o le faatauvaa, salamo faaamaoni ma le faatuatua, tatou te o faalologo ai pea ma mulimuli ai ile Alii o le Sapati, o le faaaoao sili o le alofa faaola ma galuega lelei uma.  

Amene! 

Niutuiatua Onesemo (FS) 

.………………………………………