CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Teuteronome 31:1-8

Manatu Autu: ‘Aua le faavaivai (Do not be discouraged)

E pei lava le manatu autu o taofia ai le faavaivai, o poloaiga (‘Aua!) ma tulafono e sefulu i le Esoto 20 – o loo faasāina ai, e ‘aua le faia auā e lē tusa ma le finagalo o le Atua, o le agasala e fano ai le agaga. Auā foi o le Atua e lē se Atua faavaivai, a o le Atua loto tele ma faamalosi. O le a se mea faapitoa o loto vaivai ai le nuu ma faanoanoa i lea auga tupulaga?

O upu faamalosi’au nei a le Atua a o sauni lona nuu e ulufale atu i Kanana lo latou tofi. O le faigamalaga na ta’ita’i mai e Mose, a o lea o le a tuu atu ia Iosua na te fa’aauau. Talofa ia Mose o le a lē oo o ia i le nuu, na ona vaai i ai, a e lē tu ai ona vae. Atonu o le lagona o le nuu i le taimi lea, o le loto vaivai ma faanoanoa ina o le a leai le ta’ita’i na tautiga mai le amataga, a o lenei o le a lē tofo i le suamalie o le meli ma le lololo o le suasusu o tafe i lumamea. Mata sa tau lagona foi e Iosua lea faanoanoa, peitai sa faasili ia Iosua le faalogo ma usitai i le Atua, nai lo le manatu i le uso a auauna sa fai mona ta’ita’i.

Lea ua faalototele le Atua, o Ia o loo muamua ma mulimuli ma lotolotoi i le faiga malaga a lona nuu. O ai lava le ta’ita’i na te tofia mai lea taimi i lea taimi, o ia lava lena o le a auauna ma galue i le tofiga, a o le Atua o le Ta’ita’i Sili. Poo Mose poo Iosua poo ai lava, e pule le Atua; ma na te faatonutonuina foi le amio a le ta’ita’i pe afai e alu ese mai ala o le Alii. Tatou te iloa i lana tofiga o Saulo e fai ma tupu muamua o Isaraelu, a e mulimuli ane na Ia toe sasae ese le malo mai ia te ia, a e tuu atu ia Tavita. E faapena lava i soo se ta’ita’i, i soo se malo.

O se feau talafeagai lea i lenei vaitau, a o aga atu le atunuu ma le au faatuatua i lana faiga filifiliga o ta’ita’i ma faigamalo. Atonu o loo popole, faanoanoa ma atuatuvale pe a tua i ni a? Poo ai lava e tula’i mai i lenei vaiaso, ia tatou talitonu o ia lena ua tofia e ala mai lau palota. Pe afai foi e le tusa ma sou faanaunauga, pe a tula’i mai se tagata e te manatu e pei o Saulo, ia ‘aua le loto vaivai pe faanoanoa, auā e toe suia e le Atua i lona lava aso ma lona taimi. Tau ina fai lau palota ma le saoloto, ‘aua le faatauina oe i tupe ma oloa, ae faamoemoe i le Agaga musumusu mai o le Atua.

Sa popole, faanoanoa ma atuatuvale le au soo o Iesu ina ua maliu fasia o Ia i le satauro. Peitai na faaloto tele o Ia i ana fetalaiga, aemaise o lona toetu manumalo, ma lona soifua pea e oo mai nei lava. Tatou faamalolosi ‘aua le faavaivai! O loo soifua le Alii na te lavea’i tatou mai pulega leaga ma le amiolētonu. Ma ia ia te Ia le viiga e faavavau.

Amene.

                                                                                                                    Faitoaga Tolua FS  

                                                                                                                                                                             ………………………………………