CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau:     Ioane 1: 29 – 34

Manatu Autu:  Ua molimau Ioane le Papatiso i le natura ma le tulaga mamalu o Keriso.

O loo molimau tutusa le Papatiso ia Iesu, e tusa ma le mau a Mataio, Mareko ma Luka. A o Ioane Evagelia ma lana vaai fa’aaeto fai mai, na vaai le Papatiso ia Iesu a o la’ua i totonu o le Ioritana, na afio ai le Agaga Paia i ona foliga pei se lupe ua nofo i ona luga. A suluia le lupe i le la, a o faapepepepe ifo i ona apaau, o le ata e lafoia, o le ata o le satauro. O le isi lea uiga loloto o le molimau a Ioane ia Iesu – na iloa lava i le amataga o lana galuega, o le faaolataga e faatino i ona puapuaga ma lona maliu, ma toetu mo le faaolaina o tagata. A o lea foi le uiga o le papatisoga, i le faatofu ia lilofia i le vai ma le toe faaea a’e i luga – o uiga faaleagaga faasino i lona tanumia i le tuugamau, a e toe faatuina manumalo mai le oti ma le tuugamau. E faamamafa le molimau a Ioane, i lona maliu ma le toetu.

O lea foi le uiga o lana upu, “Faauta i le Tama’i Mamoe a le Atua, na te aveesea le agasala a le lalolagi”  Na iloa lava i le amataga e le Papatiso, o Iesu le Alo o le Atua, o le tama’i mamoe e osi ai le taulaga mo lo tatou faaolaina. O le natura lea ma le tulaga mamalu o Iesu – e pei o le mamoe. E alu faalologo aunoa se upu, e pei o le tamai mamoe ua ta’ita’iina ia fasia. O lona lea valaauina mai le Tamā, ua usita’i ma faamaoni i ai, na te lē faafiti pe taumafai e ‘alofia ae sui se isi auala faigofie.

A o se feau toe faamanatu lelei mo i tatou, auā o i tatou foi e molimau ma ta’utino ia Iesu. O ai Iesu o loo e molimau i ai? A o le a le uiga o lona avea mou faaola? A o le a sa tatou tali atu i ai, e tusa o ona puapuaga ma lona maliu tiga i le satauro mo le faamagaloina o a tatou agasala? Na o se toe faamanatu, e lē toe faaluaina le galuega ua fai e le Alo o le Atua. Fai mai Peteru ia Iesu i la latou toe paseka, ‘aua le mulumuluina na o vae, a ia faapea foi ona lima ma lona ulu. Ua mana’o Peteru e manu’a foi ma ia, ia tafetotoi ona vae, lima ma le ulu pei o Iesu. A e tali Iesu, O le ua ta’ele, ia tau o ona vae, a e mamā uma ai, e lē aogā ona mulumulu uma. Ua taunuu,  ua mae’a atoatoa ona Ia faia; na pau le mea tatou te fai, o le talia, faatuatua i ai, ma tala’i atu ina ia ola ai nisi agaga. Pau o lea, afai o lona tino na manu’a ma momomo ma lona toto na maligi ia tatou saoloto, e ao foi ona tatou lagona le matuitui ma le tiga o le tali faafetai, a e lē o le faata’eta’ealuga ma fifilemu, i osiga taulaga i soo se auala, mo lana galuega fa’aauau.

Manuia le amataga o Aokuso.

Amene.

                                                                                                                       Faitoaga Tolua FS 

                                                                                                                                                                             ………………………………………