CALL : +685 24414
FAX 20429
5th Floor John Williams Building
Tamaligi, Apia
Admin : cccsit@cccs.org.ws
Tusi Faitau: Galuega 16:6-10.
Matua: Galuega 16:10. “Ua iloa e ia le faaaliga, ona sauni loa lea o i matou e o atu i Maketonia, ua manatu lava i matou, ua valaauina i matou e le Alii e folafola le tala lelei ia te i latou.”
Manatu Autu: “Folafola atu le Upu” “Spread the Word”
“Folafola atu le Upu” o le fesili, O le a le upu e folafola ia pe ta’u atu? Ioe, o le Talalelei ia Iesu Keriso. O le galuega lea a le Au Aposetolo, o lo o faamauina ma molimauina e le tusi o Galuega, o le tala’i, folafola atu le upu, le Talalelei ia Iesu. I le vaega o le mataupu e sefulu ono o le tusi o Galuega o le faitauga o lenei aso, o lo o manino mai ai lava, o le Atua lava o lo o faatonu malaga i le galuega a le Au aposetolo, ua alu le talaiga i Asia Itiiti, ae ua faatonu mai lava e le Agaga o le Atua nuu e folafola atu ai le upu. Fai mai le fuaiupu ua fai ma matua; “Ua iloa e ia le faaaliga, ona sauni loa lea o i matou e o i Maketonia, ua manatu lava i matou, ua valaauina i matou e le Alii e folafola le tala lelei ia te i latou.” E toatele tagata o Maketonia na talia le upu na folafolaina atu e Paulo ma Sila, o tinā a na muamua talia le upu le Talalelei ia Iesu Keriso, ma ua papatisoina i latou. Na faamaloloina ai foi e Paulo le tamaitai na ulutinoina e temoni, o lo o taua i le fuaiupu e sefulu ono o le mataupu lenei e sefulu ono, “……o le auauna teine ua i ai le aitu vavalo…..” ae o i tonu na mafua ai ona tuuina Paulo ma Sila i le falepuipui, ona ua la aveese le mana faataulaitu o le tamaitai lea, aua sa maua mai ai le tamaoaiga o alii o le nuu. O le i ai la o Paulo ma Sila i le falepuipui e le’i noatia ai lo la folafola atu o le upu, sa la folafola atu le upu e ala i pesepesega, ma ua matala ai o la noanoataga, vaaiga ofoofogia ia na molimauina e le leoleo o le falepuipui ma ua avea ma ala ua ia talia ai Iesu i lona loto, ua ia ave foi ia Paulo ma Sila i lona fale, ua ia mulumulu ma fafaga ia te i laua, ona papatisoina lea e Paulo o le leoleo ma lona aiga. O le folafola atu o le upu, ia po o le Talalelei, o la tatou galuega e fai faatasi, tatou te faasoa ma molimau ai i le Alofa mai o le Atua ia te i tatou. Aua tatou te palaai e molimau ia pe folafola atu le upu po o le Talalelei ia Iesu. O le upu moni e le tuulafoaiina i tatou e le Atua, e auai mai pea lona Agaga e faamalosia o tatou tagata tatou te molimau ma folafola atu lana upu. Manuia le alo atu o le tatou Ekalesia i lana faiga Taulaga o le Talalelei a taeao, Folafola atu le Talalelei, ona o Iesu,…..Amene.
Peniamina Neueli (FS)
.………………………………………
© 2024 CCCS