FEAU O LE ASO!

(Message of the day)

Tusi Faitau: Efeso 4:1-13

Matua: Efeso 4: 1-3

“O lenei, o a’u o lē ua noanoatia ona o le Alii, ou te aioi atu ia te outou, ia outou savavali e tusa ma le valaau ua valaauina ai outou. Ia outou loto maulalo ma agamalu, ma onosai. Ia outou faapalepale le tasi i le tasi i le alofa. Ia taumafaia e outou ona taofi o le loto gatasi i la le Agaga i le noataga o le filemu”.

Manatu autu: E mana’omia lo tatou mafuta faatasi (Unity is required of us).

O le mafuta faatasi i le tino o le Ekalesia – e afua mai le meaalofa o le faatuatua ua tofusia ai i tatou uma. Lea e faapea ai Paulo ia Kalatia, “auā o atalii o le Atua outou uma lava i le faatuatua ia Keriso Iesu…ua tasi lava outou uma ia Keriso” (Kalatia 3:26, 28).

O lona uiga, e manaomia lo tatou mafuta faatasi; o tatou o tagata ua faalagolago i mea ua faamoemoe iai, ua mautinoa i mea e le o vaaia, e pei ona faamatala le faatuatua e le Tusi a le Au Eperu. Ua tatou mafuta faatasi ma le faalagolago i le Atua lo tatou faamoemoe; ua tatou mafuta faatasi ma le loto mautinoa i le iai o lo tatou Atua ma i tatou – e ui e le o vaaia o ia.

Pei lava ona fetalai Iesu i ona soo, ina o le a afio i le lagi i upu mulimuli ia o lana fetalaiga, “..faauta foi, ou te ia te outou i aso uma lava, e oo lava i le gataaga o le lalolagi”. (Mataio 28: 20e).

Manaomia mafutaga, manaomia se toalua se toatolu ua mafuta ma tapuai i le Atua. O upu e masani ai – ‘o le tele o sulu e maua ai figota; o le tele o lima e mamā ai se avega’. O Samoa o le atunuu potopoto, o o le atunuu tofi, o le atunuu e mafuta faatasi ona tagata i lana aganuu, amata mai lava i aiga, o nuu ma afioga, seia oo lava i le lotu.

E aogā a tatou taleni taitoatasi mai le Atua e malosi ai ma mausali ma tumau ai lo tatou mafuta faatasi, ma tineia ai amioga inosia; pe a sousou foi le vasa ma amata ona ma’ale’ale lo tatou faatuatua, ae ua lava Iesu o loo tatou mafuta faatasi e laveai i tatou ma faamalosi lo tatou vaivai ma le lē mafaia o se mea.

O le taua lena o le mafuta faatasi – ma fefaasoaai meaalofa a le Atua ua tofusia ai – e atia’e ai lana ekalesia, ma tatou fealofani ai ma fealolofaa’i ai. O tatou o lupe sa vao eseese ae ua fuifui faatasi i le faatuatua ia Keriso. Fetalai Iesu i ona so’o, “..auā e le mafaia e outou ona faia o se mea e tasi, pe a a’u le i ai”. (Ioane 15: 5). O Iesu e toatasi lo tatou faamoemoe, o le malosi foi lea o le Alii Faaola lea e faapea ai Paulo ia Filipi, “Ou te mafaia mea uma lava, ona o ia ua faatasi mai ia te a’u” (Filipi 4:13).  

O Keriso – o le maatulimanu aupito aluga – e faavae ai lo tatou mafuta faatasi, i le amio, i le ola auauna, i le ola tatalo ma tapuai, ma le ola vivii, le alofa ma le agalelei le faatuaoia, le faia o le amiotonu ma le amio sa’o i lou valaauina ma au faaiuga fai.

Aumai Iesu tatou te mafuta faatasi ai, fai o ia ma faavae o ā tatou mafutaga, vaai ia Iesu vaai i le fa’ata pe o faa-Iesu ea lo tatou mafuta faatasi.

Manatua ‘aua nei galo Iesu na maliu mo a tatou agasala ma toetu mo i tatou uma – ina ia o tatou mafuta faatasi ma ia i lana ekalesia i lenei ola seia oo atu i le Aso o le Alii e fetalai mai ai, ‘le auauna lelei e, ma le faamaoni, ulufale maia i le fiafia o lou Alii’. Na ia fetalai i ona so’o, “Auā o se mea ua faapotopoto ai se toalua, poo se toatolu i lo’u igoa, ou te i ai faatasi ma i latou” (Mataio 18:20).

Ona o Iesu, Amene.  

                                                                                                                 Anzac Tuala (FS)  

                                                                                                                                                                  ………………………………………