FEAU O LE ASO!

(Message of the day)

Tusi Faitau: Faataoto 6:12-19

Matua: Faataoto 6: 16-19

“O mea nei e ono ua inosia e le Alii; o lona fitu foi ua matua inosia lava e ia; o mata faasiasia, o le laulaufaiva pepelo, ma lima ua sasa’a le toto o le ua le sala, o le loto e manatu i togafiti leaga, o vae e tele vavave ona taufetuli i le leaga, o le molimau pepelo, …ma lē na te faatupu maseiga i uso”.

Manatu autu: O le mafuta faatasi e taufaamata’u (Unity is threatening).

O le autu o lenei vaiaso – o le mafuta faatasi i le tino o le Ekalesia. O upu lava e masani ai, ‘e asa le faiva ae le asa le masalo’. E masani ona faapea nisi pe a o’o ni puapuaga ma ni mea faigata i nisi, ‘e le tupu fua mea faapena’. Aisea ua fasioti ai e Kaino Apelu lona uso? Aisea na inosia ai Iosefa e ona uso matutua? Aisea na sola ese ai Iakopo mai a Esau lona uso? Aisea na mata faasiasia ai le aiga o Iesu ia te ia? Aisea na faalata ai e Iuta lona Matai?

O so o se mafutaga amata mai lava i le aiga, nuu, malo e oo i le lotu pei foi ona ta’ua i tala o le Tusi Paia, e le asa ma se uiga inosia ua ta’ua e Faataoto.  O le vaivaiga masani lea o le tagata – o le mata faasiasia, o le pepelo, o le fasioti o le tagata e le sala, o le fai togafiti leaga, o le televave i le leaga, o le molimau pepelo, ma le faatupu o maseiga i uso.

E oo lava i le mafutaga a Iesu ma lona au soo e to’asefulu ma le to’alua, sa faalata ai e Iuta o se tasi o ona so’o Iesu lona Alii ma lona Matai.

Na iloa laulaufaiva pepelo ma molimau pepelo i le faamasinoga o Iesu e ositaulaga ma taitai ma toeaina o le Lotu Iutaia. Peitai – na iloa e Pilato le le moni o ia tuuaiga o Iesu e nei taitai o le lotu ma ia fafano ai ma faapea atu i le motu o tagata, “Ou te mamā a’u i le toto o lenei tagata, faitalia lava outou”. (Mataio 27:24).

O se feau tāua mo i tatou ia tatou foi mafutaga. Tatou faautauta ma mataala e le moe le fili ma ana mailei.

Tatou vaai ia Iesu – na maliu i le satauro ona o uiga inosia uma ua ta’ua e Faataoto, na tanumia i le tuugamau ma toetu manumalo i le aso tolu afio i le lagi ma auina mai le Agag Paia, ina ia faamamaina i tatou mai ia uiga leaga, i le ola toefuata’iina le ola fou ia Keriso e ala i le salamo ma le faatuatua.

Na maua mai e le Talalelei Samoa o faapea – lea ua toeitiiti atoa le 200 tausaga talu ona taunuu mai le Talalelei ma aveesea le fevataua’i o nuu ma itumalo faapea aiga o Samoa.

E leai se isi mea ta te toe fefe ai ma tau faamata’u mai – pe a ta pipi’i mau ia Keriso pei o la Paulo ia Roma, “O ai se na te faate’aeseina mai i tatou i le alofa o Keriso? O le puapuaga ea poo le atuatuvale, poo le sauā, poo le oge, poo le le lavalava, poo le pagatia poo le pelu? …A ua tatou manumalo aiai i nei mea uma lava, ona o ia ua alofa mai ia tei tatou” (Roma 8: 35, 37).

A aunoa Iesu ma ni mafutaga – e taufaamata’u ma aliali ai uiga inosia ua ta’ua e Faataoto. O le pese a le Aoga Aso Sa, ‘A iai Iesu i le aiga – o se aiga fiafia’. 

Ona o Iesu – amene!

                                                                                                                 Anzac Tuala (FS)  

                                                                                                                                                                  ………………………………………