CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau Ioane 1:10-18

Matua: “Ua liu tino tagata le Upu, sa mau foi o ia ma i tatou, na matou matamata i lona mamalu; o le mamalu lava lea o le Alo e toatasi o le Tama, ua tumu o ia i le alofa tunoa ma le faamaoni”. (Ioane 1:14)

Manatu Autu: Iesu o lo tatou Faaola. (Jesus is our Saviour).

E manatu e le faigofie ona lauga ina lenei manatu autu, aua ua manino ma malamalama lelei le tagata soifua i le uiga o le upu Faaola. E pei ona aoao ai fanau mai lava le laititi seia oo na matua. O ai lou Faaola? E sau le tali o Iesu. E ola ae la le tagata ma lona mautinoa, tau loa le suafa o Iesu o lona uiga o lona Faaola.

Peitai o le eseesega lea o tusitusiga a Ioane mai isi Evagelia, e iai Mataio, Mareko ma Luka. O Evagelia ia tolu e faamatala Iesu mai lona tupuaga, o lona soifua mai, ma ana galuega seia oo na maliu. A o Ioane e tatala lava lana tusi i le faailoa mai o Iesu le Faaola, sa iai le foafoaina o le lalolagi. Fai mai o ia o le malamalama, o le Upu ua liu tino tagata, O le Alo e toatasi o le Tama, o ia o le alofa tunoa ma le faamaoni. Ua afio mai le lalolagi na ia faia, ma militino ma tagata ae le iloa lava o ia e le lalolagi. E oo lava i lona nuu e lei talia o ia.

E lagona ua manino ma malamalama le faamatalaina e Ioane o le Faaola, ua selau iva sefulu lima (195) foi tausaga talu ona iai le talalelei i laufanua o Samoa. Ma ua manino taiala ma alafua e savalia e le tagata ina ia tumau ai lona manatua ma le iloa lelei o Iesu le Faaola.

Tatou te galulue pea ma luitau ma faafitauli e fai ma pa pupuni o lou ola tautua mo le Atua ma lana feau. A e maise lava pe a vaai mai le tiapolo ua mafana lou mafuta i le Atua, o le tele foi na o auala e tapenaina e le o loo leaga e taumafai e sosofa ai lou naunau i le Atua ma lona finagalo.

A o le faamalosi ia tumau lo tatou ola tatalo ma le loto faanaunau i le Atua e faamalosi mai, aua e leai lava so tatou malosi tatou te ola ai na o i tatou e aunoa ma lona faatasi mai. E aunoa loa le Atua ma i tatou ua leai foi so tatou faamoemoe.

O Iesu Keriso o le alofa tunoa o le Atua na ia faia o ia ma taulaga ina ia ola le tagata agasala, e ala i lona maliu ma le toetu manumalo mai le oti ma le tuugamau. Ua maua ai le ola e faavavau, e ala i le salamo ma le faatuatua ia te ia.

Tumau i le Atua lona viiga nei e faavavau

Amene.

Fiaalii Mafuolo. 

.………………………………………