CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Salamo 94: 17 – 23

Manatu Autu:  Maluapapa (Fortress)

E i ai le talitonuga o le taimi aupito pouliuli o le po, o le lata lea i le tafa o ata, ua latalata le oo mai o le malamalama. E faapena se ata o valivali mai e le faisalamo. O loo ua mata’utia le pogisa o faiga sauā, o amio leaga, pulega amioletonu ma faamasinoga pi’opi’o, mo tagata faatuatua, a o loo faatalitali i le Atua e tula’i mai e fai se lavea’i, e faailoa mai nei faiga leaga uma, o fai e tagata e lē talitonu ma lē matata’u i le Atua. O loo faatali i le tafa o ata. E pei o le vaitau i le va o le Feagaiga Tuai ma le Feagaiga Fou, tusa e 400 tausaga o nofo sauaina, ma nofo faatalitali tagata mo le tafa mai o ata o le Mesia valoia, na te faia le faaolataga. Ae sau loa Ioane le Papatiso ma folafola, o loo mulimuli mai Iesu, o Ia lena e faasino i ai le Mesia valoia ma le malamalama.

O le Salamo 94 o se salamo fetaui lelei ma le vaitau lenei o le Afio Mai, le vaitau o le nofo sauniuni ma faatali mo le afio mai o le Faaola, le fanau mai o le Mesia, faatali mo le susulu mai o le malamalama moni, e tafi ese le pogisa.

O le salamo o loo valaau ai mo le faiga o le faamasinoga amiotonu a le Atua, o le puipuiga saogalemu o ona tagata, o le filemu ma le faamafanafanaina o le fanau a le Atua. O loo valaau le salamo, ina ia loto tetele, ia nofo tatali ma le mautinoa, nofo sauniuni ma le filemu, o le Atua le ‘olo maualuga, o Ia le maluapapa, e saogalemu ai mai faiga sauā ma pulega leaga uma. “²²A e faia le Alii mo’u ‘olo maualuga; o lo’u Atua foi o le papa lea ou te malu ai.”

O lena le feau mo i tatou i lenei aso ma le vaitau O le Afio Mai. A o si’omia i tatou i faiga mata’utia a tagata leaga, ‘aua le popole. O le Alii lo tatou ‘olo maualuga, le papa e mautū tatou te malu ai, e faia le alofa ma le amiotonu, tatou te olioli ai ma faateleina le viiga o le Atua. Ia manuia tapenaga uma o le faataliga o le fanau mai o le Mesia, o Ia le Maluapapa tatou te malu ai.

Ona o Iesu. Amene.   

                                                                                                                 Faitoaga Tolua (FS)  

                                                                                                                                                                  ………………………………………