CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Matua: Ioane 14: 1 – 3

Manatu Autu: Saunia o se nofoaga (Preparing a place)

Na i’u a’u a’oga i le 1973, ona amata lea ona faigaluega i le 1974 i le Ofisa o Tupe, a o le Faletupe o Atina’e i le 1975, o iina na ofo mai ai e le alii pule ona fanua i Si’usega e ta’i kuata ‘eka mo le aufaigaluega i se tau taugofie tele e togitogi ta’i lua vaiaso. Ou te le’i talia lea ofo i lena taimi o le talavou e le’i mafaufau mamafa i se fanua ma se aiga. O le sili itiiti ma le sefulu tausaga mulimuli ane, i le 1988 na i’u ai ma Malua ma amata ona galue faafaifeau i Fugalei; na faasalalau mai fanua o le Malo i Vaitele ma fai ai le talosaga mo se fanua kuata ‘eka, e $1,000 le tiposi. Mulimuli ane, ina ua mana’omia tele se tupe, na toe tala mai ai i tua le tiposi, ae toe faafoi atu le fanua o le Malo.

O le tausaga 2009 na matou nonofo ai i le fale o le Faatonu Aoaoga Kerisiano i Malifa; na talosaga le fanua kuata ‘eka nofo lisi i fanua o le malo i Nuu fou, ma o loo i ai pea lea fanua e ui ina e lē o fausia ai se fale. O le 2019 na matou siitia ese ai ma le fale o le Ekalesia i Malifa, ma matou nonofo faatasi ai ma isi matou aiga i o latou maota. A o le 2022 na faate’ia ai a’u ina ua tuuina mai e lo matou aiga, se tasi o fanua kuata ‘eka umia saoloto i Vaitele fou, faatasi ma le fale, ou te totogi faauma le mokesi i le faletupe, a e avea ma matou aiga. O loo ua matou nonofo ai nei.

O le uiga tonu o lenei ta’utinoga, ua leva ona ou taumafai mai e saili se fanua, ma se fale mo le aiga; a ua leva ona tapena e le Atua le auala, mo le aso tonu ma le taimi e tatau ai. E saunia e le Alii mea tatou te nonofo ai i le lalolagi nei, e faapea foi ona Ia saunia le maota tatou te mautu i ai pe a uma atu iinei. O le mea lea ia ‘aua tatou te popole ma atuatuvale. O loo soifua lo tatou Alii, na te silafia mea tatou te manaomia, na te saunia mea lelei uma i le taimi e tatau ai. Ua faapea mai foi le aposetolo, A o lo tatou nuu moni o i le lagi lea… Sauni pea tatou e tautua lana Ekalesia e ala i tiute aemaise o faiga taulaga, ae taatia le taunuuga ma faamanuiaga faitalia o Ia. Manuia faiga taulaga a taeao. Amene. 

                                                                                                                    Faitoaga Tolua (FS)

                                                                                                                                                                       ………………………………………