CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau- Kalatia 6:7-10.

Matua: Fuaiupu e 7 ma le 8.

‘Aua nei faaseseina outou, e le ulagia le Atua, auã o le mea e luluina e le tagata, o le mea lava lea e seleseleina mai ai e ia.  O lẽ lulu i la le tino, e seleseleina mai ai e ia i la le tino le mea e pala. Ao se lulu i la le agaga,e selesele mai e ia i la le agaga le ola e faavavau.

Manatu Autu:  Selesele i lau filifiliga.  Reaping what you sow.

Ua taualuga le tusi lenei a le aposetolo i le ekalesia i Kalatia i lana toe faamalosi ma apoapoai atu e tusa ma le amio ia lelei ma tumau i le faatuatua i le Atua.

Ia atagia le Atua i le ola fetausiai ma le fefaasoaai. Ia olaina e tagata o le ekalesia le taua o le tulafono a Keriso. Ia faamuamua le alofa i mea uma. ‘Aua foi nei manatu ane lava se tasi o ia ua atoatoa ma lelei auã e leai lava se tasi e atoatoa seia vagana le Atua.

Ae ia sili ona tu maualuga le lagona o le faataua o le upu ma afioga a le Atua e savali ma tumau ai. E ao i le ekalesia i Kalatia ona filifili ma le tatau ma fulitua i le au taufaasese o loo taumafai e mimilo talitonuga o tagata mai le ola tapuai i le Atua. Ia sili foi ona aoaoina i latou e le ulagia e se tasi le Atua.

Afai e filifili ma le tonu ma savavali e tusa ma le faasinoga a le Agaga, e manuia foi le ola ma aeae i manuia o le Atua. O lona uiga a lulu ma totố i le loto le faatuatua faamaoni o le amio i le Atua, e selesele foi i le matalasi o le alofa faasoa mai o le Atua.

Ua manino lelei le faamanatu a fuaiupu ua fai ma Matua. O le eseesega o le taui o le tagata e lulu i le tino ma lẽ e lulủ i le agaga. E selesele e le tino le mea e pala ae selesele e la le agaga le ola e faavavau. O lona uiga o le tagata ua filifili e lulủ le faamuamua o fiafiaga ma tuinanau o le tino e selesele i le mea e pala, o le faailoga o le faalumaina ma le inosia ma maumau ai le ola ona ua pogisa le ola i ala o le Atua.

Ae o le tagata ua filifili e lulủ le upu a le Atua e faavae ai le ola o lona aiga ma lana fanau e selesele i le ola e faavavau o le nofoaga e tumu i le fiafia ma manuia o le Alii, O le uiga lea o le manatu autu o lenei aso. A tonu ma sa’o lau filifiliga e te selesele foi ma le loto faagaeetia,

O le apoapoaiga lenei a Paulo na lagona ai e le ekalesia i Kalatia le taua o le fai o le filifiliga sa’o ina ia taofia ai le avaga o latou loto i talitonuga sese a le au Iutaia ma talaiga sese ua fai ma faalavelave i lo latou ola faatuatua i le Atua.

O se faamalosi e tumu i le tamaoaiga faale agaga e faatonufolau i le filfiliga tonu a le tagata ina ia faamuamua le Atua i le ola tautua.

E taua foi le faamanatu o lenei aso i a tatou faiga filifiliga ina ia filifili ma le poto ae sili le mata’u i le Atua. O le mea moni o le seleselega e maua i le filifiliga tonu o le taui o le tagata faamaoni i lana na lulủ.

Ua tele faafitauli e tutupu mai i lo tatou siosiomaga ma le atunuu i lenei vaitau ona ua tatou filifili faale tino. Ua faavae i le fiasili ma le faamaualuga aemaise o taupulepulega leaga o le loto. Ua galo le alofa ma le loto faamagalo ae ua faumalo le fiapule ma le le fia toilalo. Ua na o le inosia lava ma le faalumaina le fua tatou te seleseleina mai ai.

Ae a tatou filifili faale agaga e pei o le faamalosi a le Aposetolo, e le toe gasẽ se mea auã ua nofotupu le agaga o le Atua i aai o finagalo. Ua tasi tagata uma i le filemu ma le fealofani ae sili le alofa atu, faasoa atu, faapalepale atu ma faaola i le tagata mativa ma le vaivai.

Filifili faatasi ma le Atua, ona selesele foi lea ma le olioli ona o le Atua.

E faapea tonu le filifiliga a Iesu e faataunuu le finagalo o lona Tama e ala i le Faaolataga na ia saunia i lona maliu ma lona toetu manumalo mai le oti, ina ia tatou selesele faatasi ai ma ia i le ola e faavavau.

Manuia le toe aso o faiva ma tiute o lenei vaiaso. Amene.

Onosai Nofoaiga (FS)

.………………………………………