CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: 1 Samuelu 18:1-7

Matua: 1 Samuelu 18: 6b-7

Manatu Autu: Tali atu i pese o lagona

O pese o lagona, o pese e fatu mai i lagona o le fatu pese. E iloa gofie lava i le pese, ituaiga lagona o loo i ai le fatu pese. Lagona o le faanoanoa, lagona o le alofa, lagona mafatia, o lagona fiafia ma le olioli. E masani ai i lo tatou aganuu, a a’e malo se fā’agatama sa tapuaia, ona lagi lea o le pese faafetai e momoli ai lagona o le au tapua’i.

“ua faafetai, ua faafetai, ua malie mata e vaai,

ua tasi lava oe, ua tasi lava oe,

i lo’u nei faamoemoe”

O le pese e faaleo atu ai lagona fiafia ma le loto ua faamalieina, ina ua taunuu manuia faamoemoega sa alo faiva i ai.

E foliga faapena lagona o le fiafia ma le faagaeetia o fafine Isaraelu. Ua o latou pepese ai ma sisiva i topa ma apa tagitagi, e faafetaia ai le tupu o Saulo, ma le itu taua a Isaraelu, ina ua a’e manuia le taua sa feagai ai. Lea na faatoilaloina ai e Tavita le toa tauataua o Filisitia, o Koliata.

Fai mai le pese a fafine Isaraelu; “ua fasia e Saulo ana toaafe, a o Tavita ana sefulu o afe”. O le pese ua faaleo mai ai o latou lagona fiafia ma le faafetai ina ua manumalo mai ia Filisitia. A e ua atagia ai foi upu faalumaluma ma le faifai. E faatupu ai lagona le fiafia ma le faanoanoa i le tagata faalogologo. E foliga mai ai i upu o a latou pese, ua tatau ona sui loa Tavita ia Saulo, e fai ma tupu ia Isaraelu.

E faapena lagona ma manatu o le feau o lenei aso. E ui ina fai pesega ma sisiva ona o le loto faafetai ma le faagaeetia. A e o loo afifi mai ai ma se feau taua mo i tatou uma. O lona uiga, e malosi le pese, e mafai ona lauga le pese, ae le pese se lauga. A e o se auala foi e momoli mai ai lagona ma manatu o le fatu pese, i se vaega o loo fia faailoa i tagata faalogologo. A ua faigata ona faaleo atu se faamatalaga, o loo mafai ona momoli atu e le pese o tatou lagona. O lagona e fai ai ma fautua malosi, o lagona e faatupu ai le filemu, o lagona e faamafanafana ai i se ua mafatia, o lagona o le faafetai, e momoli ai le viiga i le Atua.

O le Atua lava ia, na afio mai i le lalolagi e ala ia Iesu Keriso, ina ia faaolaina le lalolagi agasala, pe a fai tatou te talitonu ma faatuatua i lana faaolataga.

Tumau i le Atua lona viiga e faavavau. AMENE

Kapeni P. Matatia (AM) 

.………………………………………