CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau Efeso 5:15-20

Matua: Efeso 5:18 “Aua foi nei ona outou i le uaina, o le mea e ulavale ai; a ia faatumuina outou i le Agaga.”

Manatu Autu: Lafoa’i oe, ma tuu i le Atua / Let go, and let God.

E toatele tagata e oo foi i tagata EFKS o lo o tu’ufesili lava i le mafuaaga o le fai ai o le Fono Tele i Malua i le ogatotogu po o le masina o Me i lea tausaga ma lea tausaga. Ma o le tele lava o sauniga faapitoa a le Ekalesia e faia uma lava i le taimi o lana Fono Tele pei ona tatou masani ai. Faataitaiga, o le sauniga mo le au-Penisione, o le Faauuga o Faifeau Samoa, Fonotaga a Komiti a le Ekalesia, faapea ai ma le usuia o le Fono Tele.

A o le faamoemoe o Tama o le Ekalesia, e le o se taeao na faafuaveta, pe sa faia fo’i i so latou iloa ma se malosi, a ia tuu atu i le Atua lana Ekalesia ma ana fuafuaga uma ina ia sao ma uli. A o se fuafuaga o lo o taoto ai tua le mataupusilisili o le lafoa’i o tatou tagata, ma tuu i le Atua.

O lona uiga, o le vaitau tonu lea o le Afio ifo o le Agaga Paia e pei ona vaaia e soo o Iesu i le aso penetekoso. O faamoemoega uma o le Fono Tele, o lo o faamoemoe i le Agaga Paia o le Atua na te tautoaluaina filifiliga ma faaiuga mo le manuia o le Ekalesia.

O le ala lea o le taua i le Ekalesia o le vaitau o le tausaga o lo o faatinoina ai lana Fono Tele i le laumua talosia a le Ekalesia i Malua.

O le faamoemoe o Paulo ina ia a’oa’oina Efeso i amio e tatau mo Kerisiano, a silasila i le fuaiupu ua fai ma tatou matua, ia alo ese mai mea e leaga ai a ia faatumuina i le Agaga o le Atua.

O le Agaga na te faamaite mea lelei, na te faaosofia manatu lelei ina ia manuia ai aiga, nuu, malo aemaise le Ekalesia.

O le mea mautinoa, o le, nuu, malo, ekalesia e faamoemoe i lona lava malosi, e fevaevaea’i ona tagata. So o se taitai foi e faamoemoe i sona poto e faatino ai galuega, e mautinoa lava le faalumaina.

A o lea ua a’oa’o mai le feau o lenei aso ina ia tatou lafoai o tatou manatu ma lagona, ma tuu i le Atua nate faatonutonu folau lo tatou ola.

Faapei ona tuu tasi le faamoemoe o Iesu i le Tama, ia faapea foi ona o tatou faia, aua o le maliu o Iesu ma toetu manumalo, o le faailoga o le manumalo a’ia’i mai faafitauli uma o le ola. Ma e mafai foi ona o tatou manumalo, pe afai tatou te faamuamua le Atua.

Manuia ona o Iesu, Amene…

Loia Jr Kolia (AM) 

.………………………………………