CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Faamasino 5:1-9

Matua: Faamasino: 5:2-3

Manatu Autu: “Peseina o le manumalo o le Atua

O lo’o tatou i ai pea i lenei vaiaso i lona faamamafa; O le malosi o le Pese. E pei foi ona pese ai le tamaitai Isaraelu i le Atua ina ua manumalo i le taua.

O Tepora o se Tamaitai Isaraelu, sa fai ma Faamasino lona fa(4), na te faaola i le nuu. O ia foi o se perofeta fafine. Sa iloga lona tula’i mai e ta’ita’i i le nuu o Isaraelu, sei osi le toilalo ia Iapino ma Sesera. O se ta’ita’i e le fefe pe solomuli gofie. A e o se ta’ita’i sa taulamua e tau le taua mo le manumalo o lana itu taua.

I le mataupu 4 o loo faamatala atoa ai le manumalo o Isaraelu i le taua ma Iapino le tupu o Kanana, atoa ai ma Sesera o le na pule i lana itu taua uma. O se vaaiga uiga ese, auā e ui i le malosi o Sesera, auā sa iā te ia kariota uamea e iva selau; na ia matuā faasaua ai i le fanauga a Isaraelu i tausaga e lua sefulu. A e na faatoilaloina lava e Isaraelu ma fasiotia ai Sesera, e Iaeli le fafine Isaraelu.

O le mafuaaga lena o le vivii ma le pese faafetai a Tepora i le Atua, ona ua ia mautinoa, o le Atua na ia faia le faaolataga mo lona nuu o Isaraelu. O le faailoga manino lea, o le ta’ita’i sa faia mea uma ma le mautinoa, ona sa faalagolago i le Atua mea uma. E leai se mea e faigata i le Atua, pe a fai e tumau i le talitonu ma faatuatua ia te ia.

O le faatoilaloina o tagata malolosi e nei tinā, o le faailoga o le faaaogaina e le Atua o tagata faatauvaa e auala mai ai lona mana ma lona silisili ese. E leai lava se isi malosi e tusa ma le Atua o Isaraelu. A e o lea lava ua ‘au le inailau a tinā, ina ua faamoemoe ma faamuamua le Atua i faatinoga uma. Tatou pepese ma vivii i le Atua, auā o ia lava o le Atua o le manumalo. O lona maliu ma lona toetu manumalo mai i le oti ma le tuugamau, ua fai lea mo i tatou, pe a fai tatou te talitonu i lana faaolataga.

Ia i le Atua pea le viiga e faavavau Amene

Kapeni P. Matatia (AM) 

.………………………………………