CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Feau o le Aso: Liliu i le Atua soifua: atua ese i le Feagaiga Fou.

Tusi Faitau: Galuega 14: 8 – 18.

O Lusa na faia ai e Paulo ma Panapa le vavega i le suafa o Iesu, na faamaloloina ai le tagata pipili talu ona fanau mai. Na ofo le motu o tagata, na latou manatu o Paulo ma Panapa o ni atua, ma faaigoa Paulo ia Hereme, a o Panapa ia Seu, ma ua latou aumai manu e osi ai taulaga mo i la’ua. Na vavao e le au aposetolo ma ta’utino, o i la’ua o tagata e pei foi o latou, a o le Atua moni o Iesu Keriso, o Ia e ona le mana na faia ai le vavega. O le feau mo le motu o tagata, ia iloa le mana o Iesu Keriso, e sili atu nai lo latou atua faapaupau sa tapuai muamua i ai. Ia talitonu ma faatuatua ia Iesu, lea ua maloloina ai le pipili ua leva ona latou fesaga’i; ia osi foi taulaga o le faafetai ia Iesu, a e ‘aua le osia i tagata.

O le ituaiga atua ese lea ua taatele – o tagata latou te faia galuega ofoofogia i le suafa o Keriso, ona latou faoa lea o le viiga ma le mamalu e tatau mo le Atua, ina ua si’i i luga e tagata. O se feau faamanatu mai, ina ia tatou faamalolosi ma faamaoni i tiute ua valaauina ai, e pei o Paulo ma Panapa. A e a uma ona tatou faia o se mea, ia tuu pea le viiga i le Atua, a e ‘aua lava ne’i ia te i tatou. Auā o le fili taatele, lo tatou seetia i upu ma le faaviivii o tagata, aemaise o lo tatou fiafia e talia osiga taulaga e aumai e nai tagata mo i tatou, peisea’i o tatou e ona le mana ua faia ai vavega ma galuega tetele, peitai o le Atua na mafai ai.

Pe afai foi o lena o faapipiliina oe e le fili ma ana ‘au, ia e talitonu ma faatuatua i le Atua soifua o Iesu Keriso le Alii Faaola, ona faaolaina ai lea o i tatou. Ma lenei, ia fai i tatou ma meafaigaluega a le Atua, e faamalolo ai nisi o loo faataotolia pea i le malosi o le agasala, a e soia le tausolomua e faapipili isi uso, i upu ma tala e faamasinoina ai. Ia soifua ona o Iesu.

Faitoaga Tolua (FS) 

.………………………………………