CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: 1 Tupu 18: 20 – 40.

Feau o le Aso: Fesagaiga ma atua ese (2).

E lē uma le taua e fai, i le fesagaiga ma atua ese; auā e lē uma le amio faapaupau, o soliga tulafono, ma faiga amiolētonu i le lalolagi. Na feagai foi le perofeta o Elia ma lenei to’atuga, a o galue i aso na tupu ai i Isaraelu, o Aapo ma lana masiofo faapaupau o Iesepela mai Saitonu e ifo ia Paala. Lea na fai le sailiga o le atua moni i luga o le mauga o Karamelu, i le va o Elia ma le 450 perofeta a Paala, ma le 400 perofeta a Asaira. Na mu le taulaga a Elia, ma faamaonia ai o lona Atua, le ALII le Atua na osi feagaiga ma Isaraelu, o le Atua moni lea.

E maitauina i lenei manumalo o Elia, i le vavega na faia e le Atua, na mulimuli mai i le tatalo a le perofeta “Ia e faafofoga mai ia te au, le Alii e, ia e faafofoga mai ia te a’u, ina ia iloa e le nuu nei o oe o le Alii o le Atua, ma ua e faaliliuina mai o latou loto.”  O le feau faamanatu mo i tatou, muamua, o le taua nei e fai fua, a ua manino le manumalo o le itutaua a Keriso, e pei ona sa iloa e ana perofeta ma aposetolo. Aemaise o Ia lava san a faatoilalo Satani i luga o le satauro. Ua faamalosi’au mai lo tatou Taitai’au, “33 E maua outou e le puapuaga i le lalolagi, a ia outou loto tetele, ua ou manumalo i le lalolagi.” Ioa.16.

E faapea foi ona faamalosi’au mai le aposetolo, “Ia outou loto tetele i le Alii ma le malosi o lona mana. Ia oofu outou i outau atoatoa mai le Atua, ina ia outou mafaia ona tetee atu..” O le tatalo faatuatua, ma le loto tele o le leo faaperofeta, e faatoilaloina ai mauga tetele a le fili ma ana ‘au, o pulega faasolitulafono ma faiga amiolētonu uma. Ia tatou mataala foi, auā o atua ese foliga eseese, e maua i totonu o maota ma laoa, i totonu o aiga, o fale faigaluega ma falea’oga, e oo lava i totonu o falesā, tainane o tatou lava mafaufau ma loto, pe a lē faautauta lelei.

Ia manuia le faai’uga o le vaiaso. Soifua ona o Iesu. 

Faitoaga Tolua (FS) 

.………………………………………