CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Ioane 15:18-25

Matua: “ Afai a ni tagata o le lalolagi outou,  po ua alofa mai le lalolagi i ona tagata; ae le ni o le lalolagi outou, a ua ou filifilia outou nai le lalolagi, o le mea lea e inoino ai le lalolagi ia te outou.” (Ioane 15:19)

Manatu Autū: O se mafutaga e alofa – inoino ( A love hate relationship)

O lea lava oloo faasolo apoapoaiga a le Mesia i ona soo, o le avea ma so’o moni o Keriso, e le o se mea faigofie. Muamua lava ona faapupula e Iesu i lona ausoo i  fuaiupu amata o le mataupu lenei e 15.  O  Iesu o le vine moni ao la i latou, o ai lava la e tumau ia te ia e fua tele mai, aua e le mafai e i latou ona fai o se mea e tasi pe a leai le Keriso. Ae afai ae le tumau i latou, o le a lafoaiina i tua e pei o la laau ma faaopopoina, ona faapotopotoina ai lea e tagata ma lafo i le afi ma susunu ai. Fetalaiga ia a Iesu sa fai ma luitau i le ausoo aua le feagai ai ma le galuega talai oloo faatalitali mai. Silafia Iesu mea o le a tutupu i ona ausoo pe a mavae atu lona faamoemoe, e le tali mai tagata i le lelei ma se filemu, vaitau o le suamalie o le tuinanau ma le malosi o le tulafono. Faaopopo isi tulafono i luga o isi tulafono ma ua sue ai oa a le au faresaio ma i latou o a’oa’o o le tulafono.

Fetalai le faaola i upu ua fai ma matua, ““ Afai a ni tagata o le lalolagi outou,  po ua alofa mai le lalolagi i ona tagata; ae le ni o le lalolagi outou, a ua ou filifilia outou nai le lalolagi, o le mea lea e inoino ai le lalolagi ia te outou.” Manino lava fetalaiga a Iesu ua valaauina i latou e fai ma meafaigaluega o le Talalelei, e lei valaauina i latou e le lalolagi ae afai foi e valaauina i latou e le lalolagi e mautinoa e leai se alofa.

Aepeitai o lea ua fetalai Iesu i ona ausoo, o le galuega faa-soo moni e talia tiga, e ui lava ua alofaina e le Atua o latou tagata e fai ma auauna o le Talalelei,  aepeitai o le galuega e itagia, o le galuega oloo faatalitali mai tagata latou te faaoo le oti i le ausoo. Fetalai Iesu e le sili le auauna i lona matai, o lona uiga o a lava faaiuga a tagata o le lalolagi o le a faia ia te ia(Iesu), o le a faapea foi ona faia i ona soo.Afai latou te fasioti i le Matai e faapena foi i ana auauna, ae afai latou te talia upu a le Matai, e faapena foi ona latou teu talaiga a ona soo. O se lapataiga ao se apoapoaiga i ona soo ia manatunatu le tali mai o tagata ma le lalolagi. Mautinoa o le toatele lava o tagata o le a inoino mai ia i latou, ia aua nei o latou popole oloo manino mea uma i le Atua, aua o se inoino ia i latou ua inoino o ia i le Tamā.

Ao se faamalosiau o le Talalelei mo i tatou uma i lenei aso, ia tatou savavali faatasi ma Keriso, o a lava faigata ma faafitauli o lenei lalolagi e ita mai, e le mafai ona lepeti le faamoemoe oloo tatou tulimatai. O mafutaga oloo iai le Suafa o Keriso o se mafutaga ua alofaina e le Atua.Lenei lalolagi oloo e soifua ma ou ola ai, oloo inoino mai le lalolagi, e lafo mai mea faa-fiafia ma le suamalie tosina ai le tagata, ma iu ai ina tatou faasatauroina pea Keriso i taimi ma aso uma.Ao lea ua faamalosi mai Keriso o ia o le vine moni, o ai lava se e le tumau ia te ia e lafoaina i le afi ao le tagata ua tumau ia te ia  o le a maua le manuia ma fua tele mai. Tele faafitauli ua tutupu mai ao le faailoga lea o le ma’ai o le matamata ita mai o le lalolagi ma iu ai ina mate le lamepa a le Kerisiano.Ao le avea ma soo moni o Keriso e fagota i le sou o le masani, e tofu i totonu o afa ma matagi, e laina ma timuia ina ia taunuu le faamoemoe. Ao le a le faamoemoe? Lea na fetalai ai Keriso i le Ekalesia i Semurana i lana tusi o Faaaliga – “Ia e faamaoni seia oo le oti, ona ou avatu ai lea ia te oe o le pale o le ola”.Savavali faatasi ma Keriso i le lotomaulalo ma le faamaoni.

Amene.

Michael Poutasi (AM) 

.………………………………………