CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Filipi 1: 12 – 30

 “...o mea na oo ia te au, ua iu ina tupu atili ai le tala lelei. O lea ua faaalia ai lo’u noanoataga ona o Keriso, i le fale uma ole ‘au e leoleo atoa ma isi mea uma. E tusa ma lo’u faanaunau atu, ma lo’u faamoemoe, ina ia ou le mā i se mea e tasi, a ia ou matuā faamalosi faapei ona ou faia e le aunoa, e faapea foi i nei ona po, ina ia viia ai Keriso i lo’u tino, i le ola po o le oti. Auā o lo’u ola ua ia Keriso lea; a o lo’u oti, o lo’u manuia lea.” (fuaiupu 12 – 13, 20 – 21)

Manatu Autu: O noanoataga o Paulo / Paul in chains  

O le fesili; o le a le tatou mea e fai i noanoataga o Paulo? E tau ta’u mai o le a? O le a le tatou mea a fai  i ai? Ae faamata e iai se ao’aoga tāua ma le aogā, e lē gata  mo le au faatuatua, ae a matou ia e toa’aga e faitau Tusi Paia?

E mafai ona toe faaupu le Manatu Autu e faapea; “o le faafalepuipuina o Paulo,” ia pe faapea foi; “o le nofosala ai o le Aposetolo o Paulo i le Falepuipui. E masani ona faia a matou  asiasiga i le falepuipui ma faatino ai nisi o polokalame faa-leagaga mo le au uso o tuli ai faasalaga. O le faamoemoe  lava ia toe aumaia le faamoemoe o latou ile moa o le ala. Ia faamalosi ma aua nei galo le Atua. Le Atua e afua ai suiga fou o le olaga. Sui ai le tagata tuai e avea ma tagata fou ina ua salamo faamaoni. Toe timata ai le upega, toe fetuutuunai muniao, ma se’i toe matimati le soifua ma le ola. Ia aua nei toe a’afia mai i ni soligatulafono.

O le tasi o faamalosi sili mo latou,  e lē o le taualuga lea o le faamoemoe ma le iuga o mea uma, o le nofo ai ile falepuipui ma tuli faasalaga, leai.  Ia aua lava foi nei avea le nofo sala ai i le falepuipui ma ala e noanoatia ai faamoemoe lelei, aemaise o le maelegā e fai mea lelei mo se lumanai manuia.  

E peisea’i o le  ituaiga faamoemoe tonu lea, o lea foi o loo faailoa mai e Paulo,  i lona foi feagai ai ma ona noanoataga i le falepuipui. O lea ua talatalapipi e le Aposetolo o ia ma lona foi faafalepuipuina. E ui lava e lē o se soligatulafono matuiā na faia e le Aposetolo, ae ona o lona filiga ile Talalelei, na afua ai ona noanoataga.  Fai mai na aveesea lona faamafanafanaga ma le saolotoga, ma o le tagata e foliga faanoanoa, peita’i, sa matautia ona faamoemoega.

Sa mafaufau i le lumana’i.  E lē o le mafaufau oti, ae mafaufau ola. Sa atili ona mafaufau ma  faalatalata iā Keriso. Sa lē fefe  o ia.  Sa atili ai ona filigā  le Aposetolo, mo le faasalalauina atu o le fe'au faa - Kerisiano. O lona  fiafia e fefaasoa’ai ma isi tagata ile faatuatua, ma faafetaia ma faamalosia i soo se tulaga i soo se mea, lea e afua ai ana tusi. Faamoemoe lava foi le Aposetolo, ia filigā i lona lava faamaoni. Po o le ola ai i le saolotoga,  po o le feagai ai ma noanoataga, ia amioa'i  lava i se auala e faamamaluina ai Keriso. Aemaise ai, o lona faamoemoe; e auauna atu i isi tagata. Lea e peiseia, e manao ai Paulo ia maua le ola,  e mafai ona ia auauna mo le soifua ma le ola manuia o le au uso faatuatua mo Keriso.  Fai mai Paulo;

“...o mea na oo ia te au, ua iu ina tupu atili ai le tala lelei. O lea ua faaalia ai lo’u noanoataga ona o Keriso, i le fale uma ole ‘au e leoleo atoa ma isi mea uma. E tusa ma lo’u faanaunau atu, ma lo’u faamoemoe, ina ia ou le mā i se mea e tasi, a ia ou matuā faamalosi faapei ona ou faia e le aunoa, e faapea foi i nei ona po, ina ia viia ai Keriso i lo’u tino, i le ola po o le oti. Auā o lo’u ola ua ia Keriso lea; a o lo’u oti, o lo’u manuia lea.”

Ua manatu Paulo, o ona noanoataga, ma lona fasalaina ile falepuipui, ua o se fesoasoani tele foi lea mo le faasalalauina atu o le Talalelei. Ua lauiloa i le lalolagi, o lona faafalepuipuina, ma ona noanoataga, e afua lava ona o Keriso. Ua le toe iai se faavaivai o le Aposetolo, o lona faamoemoe ma lona faananau, ua afua ai ona le mā i se mea e tasi, ae ua faamalosi i ona noanoataga, ina ia viia Keriso i taimi uma.

O le feau foi  lea o le Talalelei. O lea ua faamalosiau mai noanoataga o Paulo mo i tatou, aemaise o soo se uso Kerisano faatuatua o loo tala’i atu le Talalelei i soo se tafa o lenei lalolagi. Faamalosi mai noanoataga o Paulo mo tatou uma, o le au uso  Kerisiano faatuatua. O le faamoemoe ia faamaoni lo tatou ola ia Keriso ma le Talalelei.  Valaauina uma i tatou ia faailoa atu Keriso ile lalolagi, ma faasalalau atu le Talalelei mo tagata uma. E tusa lava foi pe a tulaga o le olaga e oo iai, faamalosi, aua le faavaivai.  Po o le feagai ai ma faigata ma puapuaga, aemaise pe a noanoatia i tatou, ia o tatou tumau pea ma filigā mo le Atua, o loo latalata mai o ia, ia tumau le ola ia Keriso. Ia tumau le talitonu ma le faatuatua.  Ma ia o tatou famamaluina pea Keriso i soo se mea i lo tatou ola, tusa lava pe fegai ma faigata, sauaina ma faafalepuipuina ina ai tatou, ile ola, po o le oti.

 Fai mai foi Paulo;

Auā o lo’u ola ua ia Keriso lea; a o lo’u oti, o lo’u manuia lea.”

Amene

Niutuiatua Onesemo (FS) 

.………………………………………