CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Efeso 2:14-22

Matua: “O loo ua atiina ae i luga o le faavae o le au aposetolo, atoa ma le au perofeta, o le maa tulimanu o Keriso Iesu lava lea, ua faatatauina ia te ia le fale atoa, o loo alu au ae, ina ia fai ma malumalu paia i le Alii.” (Efeso 2:22-21).

Manatu Autu: Fausiaina se faavae malosi ma mautu. (Building a strong and solid foundation).

O lo o faaauau pea le faamalosi a le aposetolo i le au faatuatua i Efeso, ina ia savavali ma le mautinoa ua le o toe tagata ese i latou, e pei ona manatu iai tagata Iutaia. O le Atua ma le faaolataga ua na o tagata Iutaia e le aofia ai tagata o nuu ese.

Ua faamanatu e Paulo ia Efeso, ua tasi i tatou uma i le faaolataga ua saunia e Iesu Keriso, o le faavae mautu lea ua tapenaina e le Atua, ua fai ai o ia ma leleiga, e le gata o le va tagata, ae faapea foi le va o tagata uma ma le Atua.

O Iesu Keriso lava lea o loo ua atiina ae i luga o le fa’avae o le au aposetolo, atoa ma le au perofeta, o lona uiga, e le fa’avaeina le ekalesia i manatu ma talitonuga fa’aonapo nei, a o le tofi fa’aleagaga na tuu mai e aposetolo ma perofeta o le uluai ekalesia Kerisiano. Ua fai ai lana Afioga Paia ma taiala o le ola faaleagaga o lana fanau faatuatua.

O le feau foi lea mo tatou i lenei aso, le taua o le tatou manatua pea o le Atua i mea uma ua tatou faia, aua o ia o le faavae mautu, e tupu ai le malosi pe afai ua vaivai, e aumaia le malamalama pe a oo na pogisa, na te faatupu le mautinoa pe afai ua le iloa se mea, e faamafanafana pe a faanoanoa.

E iai pea luitau ma faafitauli o le ola tatou te fesagai i aso uma, ae o le taofi mau o le faavae mautu ua saunia e le Atua mo tatou e ala ile mafuta pea ma lona Agaga, e le taumate le manumalo aiai pea o tatou ona o lona faamalosi mai.

Iesu Keriso o le faavae mautu na tapenaina e le Atua mo lana fanau faatuatua, na maliu ma tanumia, ae na toe tu manumalo mai le oti ma le tuugamau, ua maua ai le tagata faatuatua le ola faavavau.

Tumau le Atua le viiga nei e oo faavavau.

Amene.

Fiaalii Mafuolo. 

.………………………………………