CALL : +685 24414
FAX 20429
5th Floor John Williams Building
Tamaligi, Apia

Admin : cccsit@cccs.org.ws   

 FEAU O LE ASO!

(Message of the day)

Tusi Faitau: Isaia 55: 1 – 11

Manatu Autu: O le foa’i a le Atua (God’s offer)

Ua alu lenei vaiaso o tatou vaavaai ma le ofo i le faaolataga a le Atua i auala eseese, e ala mai i lana auauna o Isaia, i lana faamafanafana mo lona nuu o Isaraelu. E mafuli lava nei faamafanafanaga ia Isaraelu, aemaise e faasino i le Isaraelu e toatasi, po o le soifuaga faalefaatuatua o tagata taitoatasi. A o le faitauga o lenei aso, ua faamamafa ai le faaolataga mo tagata e toatele, o tagata uma, aemaise o faiga malo ma pulega e le na o Isaraelu, a e aofia ai ma soo se atunuu – o nuu ese. “Faauta, e te valaau i nuu ese sa e le iloa; o nuu ese foi sa latou le iloa oe, latou te taufetuli mai ia te oe, ona o le Alii lou Atua, ma le Paia o Isaraelu;”

O se tasi lea o itu e faamamafa i lo’u manatu, e tusa ma le mataupu sa ou ta’ua i la’u penisione. E le faapea ona o a’u; a e aofia ai le manatu alofa i le toatele o le au uso a auauna, latou te lē o maua lenei faamanuiaga, sa fuafuaina mai e tamā o le Ekalesia ua lagomau mai ti’asā. O le foa’i a le Atua e lē faapito na o se vaega, e lē faapumoomoo, a e tatala le avanoa mo soo se tagata e agavaa ai.

O lea ua ofoina mai e le Atua faamanuiaga sautualasi, e maua e tagata taitoatasi, faapea foi i faigamalo; o Isaraelu foi faapea ma nuu ese. O le tamaoaiga i vai ma taumafa, o tupe ma le ‘oa i oloa ma le tamaoaiga foliga eseese, o faamanuiaga i le tino; faatasi ma le tamaoaiga faaleagaga, o le filemu ma le manuia o faiganuu lelei, o pulega amiotonu ma le alofa i soo se tagata, e le faailoga lanu pe faailoga tagata. O le foa’i a le Atua e le gata i manuia foliga sautualasi, a o lana foa’i e taualuga i le soifua o lana auauna, le Mesia  na faamaite mai totonu o le Tafeaga, lana Auauna Puapuagatia – o Iesu Keriso le Mesia valoia. Lea na amata mai le Aso Sa o ta’u ai Kuresa le Sili; peitai o le auauna moni e faia le faaolataga moni mo tagata uma i soo se auga tupulaga, o le Keriso puapuagatia lea, le Foa’i ma le Taulaga a le Atua mo i tatou uma. O ai e salamō faamaoni ma faatuatua atoatoa ia te Ia, e lē fano lava se tasi, a e maua e ia le ola faavavau.

Ua faamanatu mai ai le feau o lenei aso, a o tau faai’ui’u lenei afa tausaga, ma tatou aga’i atu i le afa lona lua o le tausaga, o le vaitau o faiga taulaga masani a le Ekalesia. Ina ia tautuana lau foai, e ala i Faiga Taulaga e masani ai; ia fai ia lelei, le aofa’iga ma le agaga e fai ai. Manatua o le foa’i lelei, o le foa’i e tupu ma saga faaopoopo atili, e i ai le faasiliga mai lena tausaga, a e lē o le toe pa’ū i lalo. Ia manuia lau foa’i, ma ia i le Atua le viiga e faavavau ona o Lana foa’i. Amene.   

                                                                                                                                                                               Rev Faitoaga Tolua

                                                                                                                                                                             ………………………………………